Artur Ohanyanın səhlənkarlıq göstərərək xidməti vəzifələrini lazımınca yerinə yetirməməsi ağır nəticələrə səbəb olub
Ermənistan Prokurorluğu ölkənin keçmiş müdafiə naziri, hazırda deputat olan Seyran Ohanyanın oğlu Artur Ohanyanı 44 günlük müharibə zamanı Azərbaycan Silahlı Qüvvələrinin Lələtəpə istiqamətində hücumunun qarşısını almaq üçün keçirilən əməliyyatda uğursuzluqda ittiham edir. AYNA.AZ erməni mediasına istinadən xəbər verir ki, istintaqa görə, bölmə komandiri Artur Ohanyanın 6-7 oktyabr 2020-ci il tarixlərində səhlənkarlıq göstərərək xidməti vəzifələrini lazımınca yerinə yetirməməsi ağır nəticələrə səbəb olub.
Prokurorluğun məlumatına görə, Ohanyan oktyabrın 6-da Qarabağdakı keçmiş separatçı qondarma qurumun “müdafiə ordusunun komandanından” Horadiz-Lələtəpə istiqamətində hücuma keçmək və qırılmış müdafiə xəttini bərpa etmək barədə göstəriş alıb. Lakin tapşırığın düzgün yerinə yetirilməməsi, “bölmələr” arasında qarşılıqlı əlaqənin olmaması, hərəkət qaydasının pozulması, qüvvələrin nizamsız bölüşdürülməsi, sonrakı planlamanın olmaması səbəbindən yerləşdirmə yerinə xeyli az sayda canlı qüvvə və texnika gətirilməsi döyüş tapşırığının uğursuzluğuna səbəb olub.
Həmin proses çərçivəsində müəyyən edilib ki, “bölmənin tabor komandiri” G.A. döyüş tapşırığında iştirak etməkdən imtina edib, silah və sursatları sayıb. O, “komandanlığından” icazə almadan hücuma keçən “batalyonu” əvvəlki mövqelərinə qaytarıb.
Ohanyana qarşı “hərbi vəziyyət, müharibə və ya döyüş şəraitində xidmətə səhlənkar münasibət” maddəsi ilə cinayət işi başlanıb.