Ermənistan Baş Prokurorluğu qərardan yuxarı məhkəməyə şikayət edəcək
İrəvanın birinci instansiya məhkəməsi Azərbaycana casusluq etməkdə ittiham olunan Ermənistan Xarici İşlər Nazirliyinin (XİN) əməkdaşı Aşkhen Aleksanyana bəraət verib. AYNA.AZ xəbər verir ki, bu barədə onun vəkili Abqar Poqosyan sosial mediada yazıb.
Ermənistan Baş Prokurorluğunun məlumatına görə, qərardan yuxarı məhkəməyə şikayət veriləcək.
Məhkəmə Aleksanyanın hərəkətlərinin xəyanət maddəsi ilə deyil, vəzifə səlahiyyətlərindən sui-istifadə maddəsi ilə bağlı olduğuna qərar verib.
Qeyd edək ki, casusluq yolu ilə dövlətə xəyanət maddəsi ilə bağlı cinayət işi 20 iyun 2025-ci ildə açılıb. Ermənistanın Avstriyadakı konsulu Aşkhen Aleksanyan iyun ayında Vyanaya uçarkən Zvartnots hava limanında saxlanılıb, lakin iş yalnız iki ay sonra ictimaiyyətə açıqlanıb.
Ondan sənədlər müsadirə edilib və bu, Azərbaycana casusluq şübhələrini artırıb.
Hadisədən sonra Milli Təhlükəsizlik Xidmətinin əməkdaşları Xarici İşlər Nazirliyinin binasında axtarış aparıb, kompüterləri və sənədləri araşdırıblar. Mənbələr iddia edir ki, Aleksanyan haqqında demək olar ki, bütün məlumatlar, o cümlədən onun təyinatı ilə bağlı məlumatlar açıq mənbələrdən silinib.
Media həmçinin xəbər verir ki, həssas məlumatlara çıxışı olan diplomatın Azərbaycan vətəndaşı ilə sevgi münasibətində olduğu iddia edilir.