Görüşdə Ukraynadakı münaqişəyə son qoymaq səyləri və İstanbulda keçirilən danışıqlardan sonra baş verənlər müzakirə olunub
Rusiya Prezidenti Vladimir Putin Rusiyada səfərdə olan Türkiyə Xarici İşlər Nazirliyinin (XİN) rəhbəri Hakan Fidanı qəbul edib. AYNA.AZ bildirir ki, Kremlin Mətbuat Xidmətindən verilən məlumata görə, görüşdə Rusiya tərəfdən xarici işlər naziri Sergey Lavrov da iştirak edib.
Bir gün əvvəl Rusiya XİN-in Mətbuat Xidməti Lavrovun Fidanla danışıqlarının mövzularını açıqlamışdı. Bunlara Suriyada əməkdaşlıq, Qara dənizdə təhlükəsiz gəmiçilik, “Mavi axın” və “Türk axını” qaz kəmərlərindən istifadə daxildir.
Bundan əvvəl Fidan artıq İstanbulda danışıqlarda Rusiya nümayəndə heyətinə rəhbərlik edən Rusiya Prezidentinin köməkçisi Vladimir Medinski ilə görüşüb.
“RİA Novosti”nin yazdığına görə, Putinlə Fidanın görüşü zamanı Ukraynadakı münaqişəyə son qoymaq səyləri və mayın 16-da İstanbulda keçirilən danışıqlardan sonra baş verənlər müzakirə edilib. Eyni zamanda, Fidan Putinlə danışıqlar zamanı iqtisadiyyat və enerji sahəsində ikitərəfli məsələləri müzakirə edib.