“Ankara və Brüsselin həll edilməli olan bir neçə ortaq məsələsi var”
“Avropa İttifaqı hazırda Türkiyəni öz sıralarına qəbul etmək üçün siyasi iradəyə malik deyil. Baxmayaraq ki, geosiyasi şərait ölkəmizi və Aİ-ni birgə işləməyə məcbur edir”. AYNA.AZ xarici mediaya istinadən bildirir ki, bu sözləri Türkiyənin xarici işlər naziri Hakan Fidan deyib.
"Geosiyasi hadisələr elə şəkildə inkişaf edir ki, Avropa İttifaqı ilə münasibətlərimizin təbiətindən asılı olmayaraq bizi birgə işləməyə məcbur edir. Rusiya-Ukrayna böhranı, Yaxın Şərqdəki böhran, Hörmüz boğazı, bölgəmizdəki hadisələr, Balkanlarda sabitliyin qorunması, ticarət və müdafiə. Türkiyənin təklif edə biləcəyi bu geostrateji, geosiyasi və geoiqtisadi üstünlükləri nəzərə alsaq, niyə Aİ-yə qoşulmur? Problem ondadır ki, Aİ-nin üzvlük şərtləri yerinə yetirildikdən sonra Türkiyəni qəbul etmək üçün siyasi iradəsi yoxdur", - deyə o Vyanada avstriyalı həmkarı Beate Meinl-Reisinger ilə mətbuat konfransında bildirib.
Fidan əlavə edib: “Türkiyənin qəbul edilməsi üçün siyasi iradə əvvəllər - keçmiş Almaniya kansleri Gerhard Şröder və Fransanın sabiq Prezidenti Jak Şirak tərəfindən nümayiş etdirilib. Lakin bu iradə 2007-ci ildə Fransanın keçmiş Prezidenti Nikolas Sarkozi tərəfindən məhv edilib. Əhəmiyyətli olan odur ki, biz heç vaxt bütün şərtləri yerinə yetirmədən Türkiyənin qəbul edilməsini tələb etməmişik. Əlbəttə ki, bir təşkilata qoşulmaq istəyirsinizsə, bunun üçün şərtlər var. Onlar sizə təqdim olunur və onları yerinə yetirdikdə qoşulursunuz".
Nazir qeyd edib ki, Aİ və Türkiyə arasında həll edilməli olan bir neçə ortaq məsələ var: “Buraya NATO-da birlikdə nə edəcəyimiz, yeni Avropa təhlükəsizlik arxitekturasının necə yaradılacağı, rəqabət şəraitinin necə yaxşılaşdırılacağı daxildir. Lakin təəssüf ki, Aİ-də tətbiq olunan qaydalara əsasən bəzi maneələr mövcuddur. Məsələn, 27 Aİ ölkəsindən 26-sı, yəni təxminən 400 milyon insan bir şey istəyirsə, əhalisi bir milyondan az olan bir ölkənin qərarı buna mane ola bilir. Buna görə də Türkiyə Aİ-dəki bu vəziyyətin qurbanına çevrilir”.
Eyni zamanda, o əlavə edib ki, hazırkı müzakirə üzvlüklə bağlı deyil, Aİ ilə mövcud müqavilələr və ticarət əlaqələrinin inkişafı ilə bağlıdır.
“Bütün hesablamalara görə, ticarət həcmi 500 milyard dollara qədər artırıla bilər. Hər iki tərəf bunu istəyir, amma onlar bu addımı ata bilmirlər. Biz üzvlükdən danışmırıq, biz mövcud gömrük ittifaqı müqaviləsindən danışırıq. Gəlin sadəcə onu yeniləyək. Bu, hər iki tərəfə fayda verəcək və Avropa rəsmiləri bizə bunu deyirlər. Amma nəsə iradənin ifadə olunmasına mane olur. Ümid edirik ki, bunun öhdəsindən gəlmək mümkün olacaq”, - deyə Fidan fikrini yekunlaşdırıb.