Luhamaa keçidin piyadalar üçün bağlanması təklif edilir
Estoniya Maliyyə Nazirliyi hökumətə Rusiya ilə sərhədi keçmə qaydalarını daha da sərtləşdirmək planını təqdim edib. Bu barədə AYNA Avropa mediasına istinadən bildirir.
“Cənub-Şərqi Estoniyanın avtomobil-sərhəd buraxılış məntəqələri vasitəsilə dövlət sərhədini keçmək və yükləri yalnız gündüz saatlarında keçirmək mümkün olacaq. Luhamaa keçidin piyadalar üçün bağlanması təklif edilir”, - deyə ölkənin Maliyyə Nazirliyindən bildirilib.
Təklifə əsasən, Koidulada (Kuniçina-Qoranın Rusiya tərəfində) sərhəd-keçid məntəqəsi səhər saat 5-dən axşam saat 22-dək açıq olacaq, malların gömrük rəsmiləşdirilməsi isə səhər saat 7-dən axşam 19-a qədər mümkün olacaq. Dəyişiklik Koiduladakı dəmir yolu keçid məntəqəsinə təsir etməyəcək.
Luhamaa keçid məntəqəsinin (Şumilkinonun Rusiya tərəfində) saat 7:00-dan 19:00-a qədər açıq qalması təklif edilir. Amma piyadalar üçün tamamilə bağlı olacaq.
Məhdudiyyətlər sanksiya tətbiq edilən mallara nəzarətin gücləndirilməsi, habelə hərəkətin təhlükəsizliyinin təmin edilməsi zərurəti ilə əsaslandırılır.
“Sərhəd-keçid məntəqələrində iş rejiminə yenidən baxılması Estoniya dövlətinin 2022-ci ilin aprelində təsdiq etdiyi Rusiya ilə iqtisadi əlaqələrin minimum səviyyədə saxlanması prinsipindən, eləcə də ötən il qəbul edilmiş sanksiyalar siyasətindən irəli gəlir”, - deyə maliyyə naziri Mart Vırklaev bildirib.