“Ankara son dövrlərdə Türkiyə-Amerika münasibətlərindəki müsbət atmosferdən məmnundur”
Türkiyə Prezidenti Rəcəb Tayyib Ərdoğan 2024-cü ilin noyabrında ABŞ-da keçiriləcək prezident seçkilərində kimin qalib gəlməsindən asılı olmayaraq, Ankara ilə Vaşinqton arasında münasibətlərin dəyişməyəcəyini bildirib.
AYNA “Eurointegration.com.ua”ya istinadən xəbər verir ki, Ərdoğanın sözlərinə görə, Türkiyə vitse-prezident və Demokratlar Partiyasının namizədi Kamala Harrislə keçmiş Prezident və Respublikaçılar Partiyasının namizədi Donald Tramp arasında gedən yarışı diqqətlə izləyir.
“Seçkilər nəticəsində kimin prezident olmasından asılı olmayaraq, Amerikaya baxışımız və münasibətlərimizdəki yüksək səviyyəli dialoqumuz dəyişməyəcək”, o əlavə edib.
Ərdoğan həmçinin ABŞ-la ikitərəfli münasibətlərin son dövrlərdəki düzəlişini alqışlayıb və Ankaranın “son dövrlərdə Türkiyə-Amerika münasibətlərindəki müsbət atmosferdən məmnun olduğunu” deyib.
"Milli təhlükəsizliyimizlə bağlı bəzi məsələlərdə Amerika administrasiyası ilə fikir ayrılıqlarımız davam edir", - Türkiyə lideri əlavə edib.