Aksiyada Ermənistanın qeyd-şərtsiz işğal etdiyi Qarabağ torpaqlarını tərk etməsi tələb olunub
Sentyabrın 29-da Güney Azərbaycanın Ərdəbil şəhərində Azərbaycan Ordusuna dəstək aksiyası keçirən fəallar saxlanılıb. Bu barədə AYNA-ya Cənubi Azərbaycanda yaşayan soydaşlarımız məlumat veriblər.
“Cənubi Azərbaycanda Qarabağı azadetmə əməliyyatına ilk dəstək Ərdəbildən gəldi. İranın polis qüvvələri dinc mitinq keçirmək istəyənlərlə şiddətlə davrandı və çoxlu sayıda etirazçını saxladı”, - soydaşlarımız bildiriblər.
Onların sözlərinə görə, Azərbaycan Respublikası Ordusunun Qarabağ ərazisini azad etmək yönündə keçirdiyi əməliyyata dəstək vermək üçün sentyabr 29-da Cənubi Azərbaycanın Ərdəbil şəhərində mitinq keçirilib: “Bu mitinqdə 100-dən artıq Güney Azərbaycan fəalı bir araya gəlib və plakatlar qaldırmaqla dəstək göstəriblər. Aksiyaçılar Qarabağ müharibəsinin bütün azərbaycanlıların müharibəsi olduğunu elan ediblər”.
Mənbələrimizin məlumatına görə, aksiyada əsas şüarlar bunlar olub: “Bir millət sizin arxanızdadır, Azərbaycan əsgəri” və “Həsrətin həsrətimdir, zəfərin zəfərim, Qarabağ”.
Aksiyada BMT-nin dörd qətnaməsi xatırladılıb, Ermənistanın Azərbaycan ərazisini işğal etməsi qınanılıb və Ermənistanın qeyd-şərtsiz işğal etdiyi Qarabağ torpaqlarını tərk etməsi tələb olunub.
Polis 50-yə yaxın etirazçını saxlayıb. Onların bəzilərinin kimlikləri də bəlli olub:
Əsgər Əkbərzadə
Müctaba Pərvin
Mürtəza Pərvin
Mustafa Pərvin
Mehdi Huşmənd
Məhəmməd Cövlani
Pərviz Syabi
Hamed Heydəri Baris
Bəhmən Xeyircu
Hüseyin Balaxani
Səccad Cövlani