“Spitamen Bank” QSC, “Düşənbə Şəhər Bankı” QSC və “Commerzbank Tacikistan” QSC siyahıdan çıxarılıb
Avropa İttifaqı (Aİ) Tacikistanın üç maliyyə qurumunu sanksiya siyahısından çıxarıb. AYNA.AZ xarici mediaya istinadən bildirir ki, Tacikistan Milli Bankının məlumatına görə, Avropa Komissiyası 23 aprel 2026-cı il tarixli qərarı ilə 20-ci sanksiya paketi çərçivəsində üç kredit təşkilatını Aİ sanksiya siyahısından çıxarıb. Bunlar “Spitamen Bank” QSC, “Düşənbə Şəhər Bankı” QSC və “Commerzbank Tacikistan” QSC-dir. Bu qurumlar əvvəllər 19-cu sanksiya paketi çərçivəsində məhdudiyyətlərə məruz qalıblar.
Qeyd olunub ki, qərar milli tənzimləyici orqanlar, müvafiq nazirliklər və agentliklər arasında Avropa Komissiyası ilə əməkdaşlığın gücləndirilməsinin, eləcə də beynəlxalq uyğunluq standartlarının ardıcıl tətbiqinin və çirkli pulların yuyulmasına qarşı mübarizə mexanizmlərinin gücləndirilməsinin birbaşa nəticəsidir.
Tacikistan bu addımın bank sektorunun daha da inkişafını əhəmiyyətli dərəcədə dəstəkləyəcəyini, investorların etibarını artıracağını və maliyyə xidmətlərinə çıxışı genişləndirəcəyini gözləyir.
Tacikistan Milli Bankı islahatlara prioritet verməyə, şəffaflığı artırmağa, daxili nəzarət sistemlərini gücləndirməyə və beynəlxalq standartlara tam uyğunluğu təmin etməyə davam edəcəyini vurğulayıb.