Tənqidçilər Trampın BMT-yə alternativ və ya rəqib yaratmağa çalışdığından qorxurlar
ABŞ Prezidenti Donald Trampın administrasiyası yaratdığı Qəzza Sülh Şurasında üç ildən çox müddətə xidmət etmək istəyən ölkələrə 1 milyard dollar ianə təklif edir. AYNA.AZ xəbər verir ki, bu barədə “Bloomberg” məlumat yayıb.
"Hər bir üzv dövlət bu Nizamnamənin qüvvəyə minməsindən etibarən üç ildən çox olmayan müddətə öz yerini saxlayacaq və sədr tərəfindən yenilənəcək. Üç illik üzvlük müddəti bu Nizamnamənin qüvvəyə minməsindən sonrakı ilk il ərzində Sülh Şurasına 1 milyard dollardan çox nağd pul ianə edən üzv dövlətlərə şamil edilmir", - deyə layihədə bildirilir.
Nizamnamə layihəsinə görə, ABŞ Prezidenti qrupun ilk sədri kimi fəaliyyət göstərəcək və kimi üzvlüyə dəvət edəcəyinə qərar verəcək.
"Qərarlar səs çoxluğu ilə qəbul ediləcək, iştirak edən hər bir üzv dövlət bir səs alacaq, lakin bütün qərarlar sədrin təsdiqindən asılı olacaq", - vurğulanıb.
Nizamnamə layihəsində şura "münaqişədən təsirlənən və ya təhdid edilən ərazilərdə sabitliyi təşviq etmək, sağlam və qanuni idarəetməni bərpa etmək və davamlı sülhü təmin etmək istəyən beynəlxalq təşkilat" kimi təsvir olunur.
“Bloomberg” yazır ki, tənqidçilər Trampın BMT-yə alternativ və ya rəqib yaratmağa çalışdığından qorxurlar.