“Biz regiondakı maraqlarımıza qarşı heç bir təhlükənin cəzasız qalmasına imkan verməyəcəyik”
ABŞ Prezidenti Co Bayden administrasiyası İranı Yaxın Şərqdə yerləşən ABŞ bazalarına hücumlar təşkil etməkdə, həmçinin Fələstin-İsrail münaqişəsini qızışdırmaqda ittiham edir. AYNA xəbər verir ki, bu barədə “The New York Post” Ağ Ev və Pentaqonun yüksək vəzifəli rəsmilərinə istinadən məlumat yayıb.
Nəşr Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbidən sitat verib: “Biz regiondakı maraqlarımıza qarşı heç bir təhlükənin cəzasız qalmasına imkan verməyəcəyik. İran ABŞ-ı birbaşa münaqişəyə sürükləməyə çalışan inkar siyasətinə sadiqdir”.
Pentaqonun sözçüsü, general Patrik Rayder isə qeyd edib ki, Vaşinqton regional münaqişəni gərginləşdirməyə çalışmır, lakin ABŞ ordusuna hücum etmək üçün proksilərdən istifadə edən Tehranın hərəkətlərinə cavab vermək üçün heç bir tərəddüd etmədən bu ssenariyə hazır olacaqlar.
Bundan əvvəl Pentaqonun rəhbəri Lloyd Ostin ABŞ-ın Yaxın Şərqdə münaqişənin gərginləşməsinə hazır olduğunu və digər ölkələrə və qruplara bu münaqişəyə qoşulmamağı tövsiyə edib. Ostin vurğulayıb ki, ABŞ hakimiyyəti potensial eskalasiyadan narahatdır və bütün regionda Amerika hərbçilərinə və vətəndaşlarına qarşı hücumların sayının əhəmiyyətli dərəcədə artması perspektivini görür.