“Məqsədlərdən biri Rusiya ərazisində “bufer zona”nın yaradılmasıdır”
Ukrayna Prezidenti Volodimir Zelenski gündəlik videomüraciətində bildirib ki, Ukrayna Silahlı Qüvvələrinin (AFU) Kursk vilayətində əməliyyatının məqsədlərindən biri Rusiya ərazisində “bufer zona”nın yaradılmasıdır.
AYNA xəbər verir ki, bununla bağlı o, Ukraynanın müttəfiqlərindən hərbi yardımın çatdırılmasını sürətləndirməyi xahiş edib: “Bizə həllər lazımdır, elan edilmiş paketlər üçün vaxtında logistikaya ehtiyacımız var. Mən indi xüsusilə ABŞ, Böyük Britaniya və Fransaya müraciət edirəm”, - deyə Zelenski bildirib.
Kiyevin Sumı və Ukraynanın digər vilayətlərini Rusiyanın atışmalarından qorumaq üçün Kursk vilayətində “təhlükəsizlik zonası” yaratmaq niyyətində olduğunu ölkənin reinteqrasiya naziri İrina Vereşçuk daha əvvəl bəyan etmişdi. Onun sözlərinə görə, bu zonada olan ruslar beynəlxalq humanitar hüquqla qorunacaqlar.
Həmçinin Vereşçukun qeyd edib ki, Kiyev rusların həm Rusiyaya, həm də Ukraynaya təxliyəsi üçün humanitar dəhlizlər açacaq.
Bundan əvvəl Zelenski Kursk vilayətində hərbi komendantlıq yaradıldığını açıqlamışdı.
“Ukrayna sərhəd icmalarında özünü və əhalisinin həyatını müdafiə edir və Rusiya ərazisində aktiv fəaliyyət göstərir”, - deyə Prezident bildirib.
Qeyd edək ki, Ukrayna ordusu avqustun 6-da səhər saatlarında Kursk vilayətinə daxil olub və avqustun 15-dək 1150 kvadrat kilometr ərazini nəzarətə götürüb. Həmçinin, Ukrayna hərbçiləri çağırışçılar da daxil olmaqla 2 minə yaxın insanı əsir götürə bilib.
Rusiya ərazisində Kursk, Belqorod və Bryansk vilayətlərində gedən döyüşlər fonunda “antiterror əməliyyatı” rejimi tətbiq edilib. Bundan əlavə, Kursk və Belqorod vilayətlərində federal səviyyədə fövqəladə vəziyyət elan edilib.