Tərəflər hərbi sahədə əməkdaşlığı da müzakirə edəcəklər
Ukraynanın xarici işlər naziri Andriy Sibiqa Türkiyəyə rəsmi səfər edəcək. Nazir həmkarı Hakan Fidan, milli müdafiə naziri Yaşar Gülər və ticarət naziri Ömər Bolat ilə görüşlər keçirəcək.
AYNA-nın xəbərinə görə, Ukrayna Xarici İşlər Nazirliyindən (XİN) bildirilib ki, tərəflər hərbi sahədə əməkdaşlığı da müzakirə edəcəklər.
Qeyd olunub ki, səfər zamanı Kiyev və Ankara siyasi, iqtisadi, hərbi-sənaye və mədəni-humanitar sahələrdə ikitərəfli əməkdaşlığın genişləndirilməsi, Qara dəniz və Qara dənizin təhlükəsizliyində gəmiçilik azadlığı məsələlərinə toxunacaqlar.
“Danışıqlarda xüsusi diqqət Prezident Volodimir Zelenskinin “Qələbə planı”, Ukraynanın NATO-ya inteqrasiyası və “Sülh formulu”na veriləcək”, - bəyanatda qeyd edilib.
Bundan əlavə, Türkiyədə Sibiqa bir sıra danışıqlar aparacaq və müdafiə sənayesi sərgisinə baş çəkəcək. Burada Türkiyənin müdafiə şirkətləri ilə ayrıca görüşlər keçirəcək.
Bundan əvvəl Türkiyənin xarici işlər naziri Hakan Fidan bildirib ki, Ankara NATO-nun Rusiya ilə Ukrayna arasındakı münaqişənin birbaşa iştirakçısına çevrilməsini istəmir.