Vəkil: “İlkin baxış iclası bu gün saat 16:00-da olacaq”
Tofiq Yaqublu barəsindəki hökmdən verilən şikayətə bu gün Bakı Apellyasiya Məhkəməsində baxılacaq. AYNA xəbər verir ki, bu barədə vəkil Elçin Sadıqov bildirib. Vəkil deyib ki, 28 sentyabr 2020-ci il tarixinə təyin edilmiş apellyasiya şikayətinə ilkin baxış iclası ləğv edilib.
“İlkin baxış iclası bu gün saat 16:00-da olacaq. Şikayətə hakim Elmar Rəhimovun sədrliyi ilə baxılacaq”, - deyə vəkil vurğulayıb.
Onu da bildirək ki, bu gün həmçinin həbs qətimkan tədbirinin ev dustaqlığı ilə əvəz olunması barədə vəsatətə də Nizami Rayon Məhkəməsində baxılacaq”.
Qeyd edək ki, Nizami Rayon Məhkəməsi Tofiq Yaqublunun 4 il 3 ay müddətinə azadlıqdan məhrum edilməsi barədə hökm çıxarıb.
İttihama görə, avtomobil qəzası zamanı T.Yaqublu digər maşının sürücüsünü və onun yanında olan həyat yoldaşını təhqir edib, vurub, sürücüyə vintaçanla xəsarət yetirib. O, ittihamları qəbul etmədiyini bildirir.
Tofiq Yaqublu 17 gündür aclıq aksiyası keçirir. O, sentyabrın 12-də istintaq təcridxanasından “City Hospital”a köçürülüb.