“Qarabağ” nağılı-2021 hələ xoşbəxt sonluğa doğru davam edəcək
Beləliklə, futbol üzrə Avrosezon-2021 başa çatdı. Bu mövsüm azərbaycanlı azarkeşlərin qəlbində birmənalı hisslər buraxmadı. Bir tərəfdən “Qarabağ” ölkə futbolu tarixində ilk dəfə avrokubok turnirinin qrup mərhələsini adlaya bildi. Digər tərəfdən, Konferensiyalar Liqasında qrup qalibi olmaq üçün tarixi şans əldən verildi: "Bazel"lə son matçda yalnız qələbə lazım olan oyunda “köhlənlər” uduzdu - 0:3. Təbii ki, futbolda “oyun unudulur, hesab qalır” deyimi ləğv olunmayıb. Amma təkcə dünənki “Bazel”lə oyun azərbaycanlı azarkeşlərin yaddaşında uzun müddət qalacaq. Hər şey ola bilərdi və prinsipcə hesab da fərqli olmalı idi.
Cəmi bir il əvvəl yerli klubun avrokubokların qrup mərhələsində qələbə qazanma ehtimalı bizə nə qədər əlçatmaz görünsə də, iştah diş arasındadır. Bu mövsüm “Qarabağ” Avropa səviyyəli futbol nümayiş etdirir. Artıq qrupda Bakıda “Bazel”lə ilk oyunda Qurban Qurbanovun yetirmələri qələbəyə çox yaxın idi. Amma bir az uğursuzluq, üstəlik isveçrəlilərin təcrübəsi ilə komandalar sülhə razılaşmalı oldu. Amma sonrakı oyunlarda ağdamlılar nəyə qadir olduqlarını göstərdilər. Və qrupda qələbəyə real iddialılarla son görüşə yaxınlaşdıq.
Oyun "köhlənlər" üçün əsl möcüzə ilə başladı: artıq 2-ci dəqiqədə çempionumuz əla kombinasiya yaratdı, “Bazel”in bütün müdafiəsini çarəsiz buraxdı və Zubir topu qapıya göndərdi. Qol! Amma... Baş verənlər ən çox qorxduğumuz və “Qarabağ”ın baş məşqçisinin müsahibələrində dəfələrlə dedikləri oldu: hakimlərin bir anda hamısının gözləri tutuldu. Meydan sahiblərinin oyunçusu topu qapı xəttindən çıxarmağa çalışsa da, buna yalnız top xətti bir metr keçəndən sonra edə bildi. Hakimlər - nə əsas, nə yan - qolu "görmədilər". Və “Qarabağ”lıların bütün müraciətləri heç bir effekt vermədi. Təəssüf ki, Konferensiyalar Liqasında nə VAR sistemindən, nə də “Qol xətti”ndən (Goal line sistemi) istifadə edilir.
Hakimlərin “korluğu” təsadüfdürmü? Təbii ki, bunu qəza kimi silə bilərsiniz. Bəli, ancaq bu “qəzalar” dövri xarakter aldıqda, istər-istəməz, sən fatalist olmaqdan çıxırsan. Hakimlərin “Qarabağ”a qarşı “oynadığı” bu cür “korluqlarını” çox sadalamaq olar və ən çox təhqiredicisi, indi də qəzəblənməməyin mümkün olmadığını xatırladan ağdamlıların Avropa Liqasında əfsanəvi “İnter”lə qarşılaşmanın 4-cü dəqiqəsində vurduğu 100 faizlik “təmiz” qoludur. Hansını ki, yenə də “görmədilər”...
Kimsə etiraz edə bilər ki, onuz da sonda “Qarabağ” 0:3 hesabı ilə uduzdu və həmin epizodda hakimlər qolu saysalar belə, nəticə bizim xeyrimizə olmayacaqdı. Amma belə bir mühakimə yürüdənlər, şübhəsiz ki, futboldan heç bir şəkildə xəbəri olmayan adamlardır. Əgər “Qarabağ” artıq görüşün açılışında hesabı açsaydı, bu, rəqibə çox böyük psixoloji təsir göstərəcəkdi. Bundan əlavə, isveçrəlilər böyük qüvvələrlə hücuma tələsmək məcburiyyətində qalacaqdılar ki, bu da arxa cəbhənin boşalmasına, ardınca "köhlənlər"in sürətli əks-hücumlarına səbəb olacaqdı.
Amma elə bir hadisə baş verdi ki, bu, idman növünün gözəlliyinə böyük kölgə salır və UEFA-nın ayıbını üzə çıxarır. Məhz sonuncu struktur uzun illər belə hakim “səhvləri” silsiləsində kənar və amorf müşahidəçi olub. Sırf simvolik olsa da, ən azı bəzi addımlar atmağa borcludurlar. Amma belə addımlar müşahidə olunmur.
Matçın sonrakı gedişatına gəlincə, ilk növbədə özümüzü günahlandırmalıyıq. Qarşılaşmanın taleyini yalnız İbrahima Vaci təkbaşına əvvəlcədən müəyyən edə bilərdi. Lakin 9 dekabr 2021-ci il onun günü deyildi: o, mümkün olan hər şeyi kənara vurdu. Müdafiə də bizi məyus etdi. Kobud səhvləri Azərbaycan çempionatında hələ bağışlamaq olar, amma Avropa arenasında yox.
Bu oyunda adı yaxşıya çəkilənlər sırasında ilk növbədə Zubirin, Kadinin və eyni zamanda Vacinin səylərini xüsusilə qeyd etmək lazımdır. Lakin Maksim Medvedyev və Qara Qarayev oyunları ilə onların səylərini dəstəkləmədilər. Və ümumiyyətlə, yəqin ki, gələn il Q.Qurbanov yaşlarına görə artıq bütün komandanın orta səviyyəsindən xeyli geri qalan Medvedyev və Qarayevin rotasiyasını ciddi şəkildə düşünməli olacaq.
Bütün deyilənlərdən sonra, fikrimizcə, aşağıdakı nüansı mütləq qeyd etmək lazımdır. Unutmaq olmaz ki, “Qarabağ” Azərbaycan klubudur. Bu, Azərbaycan çempionatında çıxış edən klubdur ki, burada ondan əlavə, daha 7 komanda çıxış edir və onlar səviyyəsinə görə Ağdam klubundan xeyli aşağıdır. “Qarabağ” daxili çempionatda praktiki olaraq meydanda ciddi müqavimətlə üzləşməyən klubdur (İsveçrəyə yola düşmək ərəfəsində “Qarabağ”ın heç olmasa son oyununu xatırlayaq. Ağdamlılar qalib olmaq üçün ciddi cəhdlər etmədən “Sabah” üzərində 5:1 hesabı ilə qələbə qazandılar).
Çempionumuzun Konferensiyalar Liqasının qrup mərhələsinin son oyununda rəqibi İsveçrə təmsilçisi olub. Bu isə nə deməkdir - futbolsevərlərə çox şeyi izah etməyə ehtiyac yoxdur. Ona görə də reallıqdan çox da uzaqlaşmayaq.
İndi “Qarabağ”ı yazda Konferensiyalar Liqasının pley-off mərhələsi gözləyir. Ümid edək ki, Qurbanov qış tətilində xüsusilə müdafiədə komandanı gücləndirmək variantları tapa biləcək. “Qarabağ” nağılı-2021 isə hələ xoşbəxt sonluğa doğru davam edəcək.