Şəkidə uşaq bağçasında 105 min manat mənimsənilib, cinayət işi başlanılıb

Xəbərlər

21.06.2024 - 20:49

Həkimlər Klinikalar SEO Xidməti

Baş Prokurorluq: "Bağça direktorunun 105 min manat məbləğində pul vəsaitini mənimsəməsinə əsaslı şübhələr müəyyən edilib"

Şəki şəhər 16 saylı uşaq bağçasında yol verilən qanunsuzluqlarla bağlı daxil olmuş vətəndaş müraciəti əsasında rayon prokurorluğunda araşdırma aparılıb. AYNA xəbər verir ki, bu barədə Baş Prokurorluq məlumat yayıb.

Bildirilib ki, araşdırma zamanı həmin uşaq bağçasının direktoru tərəfindən 2019-2023-cü illər ərzində öz qulluq mövqeyindən istifadə edilməklə ona etibar edilmiş 105 min manat məbləğində pul vəsaitinin müxtəlif yollarla mənimsənilməsinə əsaslı şübhələr müəyyən edilib.

Faktla bağlı Şəki rayon prokurorluğunda Cinayət Məcəlləsinin 179.3.2 (külli miqdarda mənimsəmə) və 308.1-ci (vəzifə səlahiyyətlərindən sui-istifadə) maddələri ilə cinayət işi başlanaraq istintaq aparılır.

Müəllif: Ayna.az