Dmitri Peskov: “Bu, qeyri-adi haldır və İrəvanla münasibətlərimizin ruhuna uyğun gəlmir"
Rəsmi Moskva Ukrayna Prezidenti Volodimir Zelenskinin İrəvandakı açıqlamaları ilə bağlı Ermənistandan açıqlama gözləyir. AYNA.AZ rus mediasına istinadən bildirir ki, bu barədə Kremlin mətbuat katibi Dmitri Peskov deyib.
Peskov İrəvanda keçirilən Ermənistan-Aİ sammitini "normal" adlandırıb və qeyd edib ki, Ermənistan "xarici siyasətində çoxvektorlu yanaşmaya sadiqdir və bu cür sammitləri keçirmək Ermənistanın tamamilə suveren hüququdur".
“Yeganə qeyri-adi şey İrəvanın tamamilə Rusiya əleyhinə bəyanatlar üçün platforma təmin etməsidir. Bu, qeyri-adi haldır və İrəvanla münasibətlərimizin ruhuna uyğun gəlmir", - Peskov vurğulayıb.
Onun sözlərinə görə, Rusiya Ukrayna liderinin İrəvandakı "Rusiya əleyhinə bəyanatları" ilə bağlı Ermənistandan izahat gözləyir: "Əlbəttə ki, biz yəqin ki, İrəvandan müəyyən izahat gözləyirik".
“Moskva anlamır ki, niyə Ermənistandan Rusiya əleyhinə bəyanatlar gəlir və Ermənistan hökuməti başçısı bunu öz bəyanatları ilə bir şəkildə balanslaşdırmağa çalışmır. Əsas məsələ odur ki, Ermənistan Rusiya əleyhinə mövqe tutmur. Bizim üçün ən vacib olan budur", Peskov vurğulayıb.
Qeyd edək ki, Ermənistan 4-5 may tarixlərində Avropa Siyasi Birliyi sammitinə və Ermənistan-Aİ sammitinə ev sahibliyi edib. Avropa Siyasi Birliyi sammitində çıxış edən Ukrayna Prezidenti 9 may Moskvada keçirilən parada toxunaraq, xüsusilə "Ukrayna dronlarının da bu paradda uça biləcəyini" bildirmişdi.