İlham Əliyev: “Cəbrayıl şəhəri və rayonun 9 kəndi işğaldan azad edilib”
Azərbaycanın Ali Baş Komandanı, Prezident İlham Əliyev hazırda Azərbaycan Televiziyası (AzTV) vasitəsilə xalqa müraciət edib.
AYNA-nın xəbərinə görə, Prezident Cəbrayıl şəhərinin və rayonunun kəndlərinin ermənilərin işğalından azad edilməsi barədə danışıb: “Cəbrayıl şəhəri və rayonun 9 kəndi işğaldan azad edilib. Mən xalqımızı bu münasibətlə təbrik edirəm”.
Azərbaycan Prezidenti bildirib ki, digər ərazilərimiz də işğaldan azad ediləcək.
“Biz öz torpağımızda döyüşürük, vuruşuruq. Bizim ərazi bütövlüyümüz bərpa edilməlidir və biz haqq yolundayıq. Bizim əsgərimiz xilaskar əsgərdir. Çünki öz doğma dədə-baba torpağını işğalçılardan azad edir. Bu gün cəbrayıllılar, əlbəttə ki, sevinc içindədirlər, necə ki, bütün Azərbaycan xalqı. Dünən bizim qədim yaşayış yerimiz – Suqovuşan qəsəbəmiz işğaldan azad edildi. Bütün Azərbaycan xalqı bu tarixi hadisəni qeyd edirdi, bir-birini təbrik edirdi, göz yaşlarını saxlaya bilmirdi. Bu, sevinc göz yaşlarıdır. 1990-cı illərin əvvəllərində də Azərbaycan göz yaşlarını töküb. Ancaq o, məğlubiyyət göz yaşları idi, o, faciə göz yaşları idi”.
Azərbaycan Prezidenti qeyd edib ki, bu gün Azərbaycan xalqı sevinc içindədir: “Cəbrayıllılara və bütün Azərbaycan xalqına bu gün azad edilmiş yaşayış məntəqələrinin adlarını sadalamaq istərdim. Bu gün şanlı Azərbaycan Ordusu aşağıdakı yaşayış məntəqələrini azad edib: Cəbrayıl şəhəri, Karxulu kəndi, Şükürbəyli kəndi, Yuxarı Maralyan kəndi, Çərəkən kəndi, Daşkəsən kəndi, Horovlu kəndi, Decal kəndi, Mahmudlu kəndi, Cəfərabad kəndi. Bu kəndlərin sakinləri, sizə müraciət edirəm, sizin həsrətinizə son qoyulur və bizim digər bütün qaçqın, köçkün soydaşlarımız bilsinlər ki, biz onları da onların dədə-baba torpaqlarına qaytaracağıq. Güc yolu ilə!”, - deyə dövlətimizin başçısı bildirib.