"Biz artıq Ukrayna tərəfinə siqnal vermişik və hətta macar azlığının - dil və digər hüquqları ilə bağlı işçi məsləhətləşmələrə başlamışıq”
Macarıstanın Baş naziri Peter Madyar Ukrayna-Macarıstan məsləhətləşmələri başa çatdıqdan sonra Zakarpatye vilayətinin Berehove şəhərində Ukrayna Prezidenti Volodimir Zelenski ilə görüşə bilər. AYNA.AZ “Ukrinform”a istinadən bildirir ki, bu barədə Macarıstan hökumətinin yeni rəhbəri deyib.
Polşa Baş naziri Donald Tusk ilə birgə mətbuat konfransı zamanı Madyar bildirib ki, rəhbərlik etdiyi “Tisza” Partiyası hökumətinin qurulması “Ukrayna və Macarıstan arasındakı münasibətlərdə yeni imkanlar açır”.
"Biz artıq Ukrayna tərəfinə siqnal vermişik və hətta macar azlığının - dil və digər hüquqları ilə bağlı işçi məsləhətləşmələrə başlamışıq ki, onlar da Avropa İttifaqındakı hər kəsin sahib olduğu hər şeyi ala bilsinlər. Ümid edirəm ki, bu işçi danışıqlar seriyası tez bir zamanda başa çatacaq və təklif etdiyim kimi, çox güman ki, macarların əhalinin əhəmiyyətli bir hissəsini təşkil etdiyi Zakarpatye vilayətinin Berehove şəhərində Prezident Zelenski ilə görüşə biləcəyik", - Macarıstan Baş naziri bildirib.
Madyarın sözlərinə görə, Macarıstan Transkarpatiyadakı macar azlığı ilə bağlı məsələlər həll edildikdən sonra Ukraynanın Avropa İttifaqına daxil olması ilə bağlı ilk danışıqlar qrupunun açılmasına razılıq verəcək.
Bundan əvvəl Macarıstanın Baş naziri Budapeşt və Kiyevin Transkarpatiyadakı macar azlığının hüquqlarının qorunması ilə bağlı texniki danışıqlara başladığını açıqlamışdı.
Macarıstan hökuməti başçısının sözlərinə görə, tərəflər artıq məsləhətləşmələrin texniki mərhələsinə başlayıblar və bunun məqsədi Transkarpatiya bölgəsindəki macarların hüquqlarına mümkün qədər tez həll yolu tapmaqdır.