Onlardan iki nəfərinin barəsində inzibati qaydada həbs qərarı çıxarılıb
Ölkə ərazisində xüsusi karantin rejiminin tələblərini pozanlara qarşı tədbirlər davam etdirilir. Daxili İşlər Nazirliyinin (DİN) mətbuat xidmətindən AYNA-ya verilən məlumata görə, Zərdab rayonu Aşağı Seyidlər kəndində, “Seyidlər bağı” adlanan ərazidə, Kür çayının sahilində bir qrup şəxs toplaşaraq yeyib-içmək məclisi təşkil edib.
“Xüsusi karantin qaydalarını kobudcasına pozan həmin şəxslər təşkil etdikləri məclisin video görüntülərini çəkərək sosial şəbəkələrdə paylaşıblar. Məlumat daxil olan kimi Zərdab Rayon polis Şöbəsinin əməkdaşları tərəfindən həmin məclisdə iştirak edən və karantin qaydalarını pozan 19 nəfər saxlanılıb. Onlardan ikisi məclisin təşkilatçıları - rayon sakinləri Rza Alxasov və Sabiq Nəbiyev rayon məhkəməsinin qərarı ilə 10 sutka inzibati qaydada həbs edilib. Digərləri barəsində isə İnzibati Xətalar Məcəlləsinin 211-ci maddəsi ilə tədbir görülərək 100 manat miqdarında cərimə ediliblər”, - deyə DİN-dən bildirilib.