“Həyata dəyər verən normal insanlar bir neçə günlük deyil, ömürlük atəşkəsdən danışırlar”
“Rusiya da oxşar addım atacağı təqdirdə Kiyev Pasxa bayramı üçün atəşkəsə hazırdır”. AYNA.AZ xarici mediaya istinadən bildirir ki, bu sözləri Ukrayna Prezidenti Volodimir Zelenski deyib.
"Biz Pasxa bayramı üçün atəşkəsə hazırıq. Mənim fikrimcə, dürüst olmaq lazımdırsa, həyata dəyər verən normal insanlar bir neçə günlük deyil, ömürlük atəşkəsdən danışırlar. Amma biz ləyaqətimiz və suverenliyimizlə bağlı güzəştlər istisna olmaqla, hər hansı bir güzəştə mütləq hazırıq", - deyə Zelenski bildirib.
Prezident həmçinin qeyd edib ki, Ukrayna qlobal enerji böhranı fonunda tərəfdaşlarından Rusiyanın neft infrastrukturuna təsirini azaltmağı xahiş edən siqnallar alır. Eyni zamanda, Zelenski güzgü yanaşmasının mümkün olduğunu vurğulayıb: "Əgər Rusiya Ukrayna enerji obyektlərinə hücum etməməyə hazırdırsa, biz onların enerji obyektlərini vurmayacağıq”.
Zelenski hansı tərəfdaşlardan danışdığını dəqiqləşdirməyib.
Ukrayna lideri həmçinin Yaxın Şərq ölkələri ilə "tarixi razılaşmalar"ı açıqlayıb. Zelenskinin sözlərinə görə, Kiyev Fars körfəzi ölkələrindən enerji dəstəyi barədə razılığa gəlib, həmçinin dəniz dronları sahəsində əməkdaşlıq və Ukrayna təcrübəsinin ixracını müzakirə edib.
Ukrayna həmçinin Qara dəniz dəhlizinin açılması təcrübəsini bölüşüb ki, Zelenskinin sözlərinə görə, bu, Hörmüz boğazında təhlükəsizliyin təmin edilməsi üçün faydalı ola bilər.
Rusiya ilə danışıqlarla bağlı sualı cavablandıran Zelenski bildirib ki, Vaşinqtonun İrana diqqəti səbəbindən Ukrayna, ABŞ və Rusiyanın iştirakı ilə üçtərəfli görüşlər təxirə salınır. Bundan əlavə, Ukrayna liderinin sözlərinə görə, Moskva ABŞ-da dialoqdan imtina edib və alternativ platformalar - Türkiyə və ya İsveçrəni təklif edib.