Gömrük nəzarətindən gizlədilən ümumi çəkisi 136 qram olan heroin aşkarlanıb
Cənub Ərazi Baş Gömrük İdarəsinin Biləsuvar gömrük postunda İran İslam Respublikasından piyada gələn Azərbaycan Respublikası vətəndaşının özü ilə gətirdiyi əl yükləri rentgen aparatından keçirilən zaman monitorda şübhəli predmetlərin təsviri görünüb və vətəndaş sorğu-sual olunub.
Dövlət Gömrük Komitəsinin (DGK) Mətbuat və İctimaiyyətlə Əlaqələr İdarəsindən AYNA-ya verilən məlumata görə, şifahi sorğu-sual zamanı vətəndaş ona məxsus bağlamalarda gömrük nəzarətindən gizlədilən, mütləq bəyan olunmalı hər hansı predmetin, o cümlədən narkotik vasitələrin, psixotrop maddələrin olmadığını, əl yüklərində müxtəlif ərzaq malları və sarmaşıq dibçəyinin olduğunu bildirib.
Yoxlama zamanı isə içərisində 2 ədəd sarmaşıq dibçəyi olan bağlamada gömrük nəzarətindən gizlədilən ümumi çəkisi 136 qram olan narkotik vasitə - heroin aşkarlanıb.
Hazırda faktla bağlı araşdırma aparılır.