Təhlükəsizlik Şurası Suriyada inklüziv siyasi prosesin aparılmasına çağırıb
BMT Təhlükəsizlik Şurası Suriyada 2254 saylı qətnamənin əsas prinsipləri əsasında inklüziv siyasi prosesin aparılmasına çağırıb. AYNA xarici mediaya istinadən bildirir ki, bu barədə Təhlükəsizlik Şurasının yaydığı bəyanatda deyilir.
Şura üzvləri BMT Baş katibinin Suriya üzrə xüsusi nümayəndəsi Geir Pedersenin bu prosesi asanlaşdırmaq səylərini dəstəklədiklərini bir daha təsdiqləyiblər.
Bəyanatda bütün suriyalıların qanuni istəklərinə cavab verən, onları qoruyan və gələcəklərini dinc, müstəqil və demokratik şəkildə təyin etmələrini təmin edən prosesin zəruriliyi vurğulanır.
Şura həmçinin Suriyanın suverenliyi, müstəqilliyi, birliyi və ərazi bütövlüyü prinsiplərinə sadiqliyini təsdiqləyib və bütün dövlətləri bu prinsiplərə hörmət etməyə çağırıb.
BMT Təhlükəsizlik Şurasının üzvləri Suriyada terrorizmlə mübarizənin vacibliyini, İŞİD ekstremist qruplaşması və digər terror qruplarının yenidən dirçəlməsinin qarşısının alınmasının vacibliyini vurğulayıblar. Sənəddə Suriya qeyri-ənənəvi silahlarla bağlı Şuranın qətnamələrinə əməl etməyə çağırılır.
Şura humanitar imkanların təmin edilməsi də daxil olmaqla, beynəlxalq humanitar hüquqa hörmət etməyə çağırıb və qurbanlar, ailələr və Suriya xalqı ilə həmrəy olduğunu bildirib.
İsrailin işğalı altında olan Suriyanın Qolan Təpələrində BMT Müşahidəçi Qüvvəsinə dəstək verilməsinin və onun mandatının, o cümlədən 1974-cü il Müqaviləsinə əməl olunmasının yerinə yetirilməsinin vacibliyi də qeyd edilib.
Sonda BMT Təhlükəsizlik Şurasının üzvləri beynəlxalq hüquq normalarına uyğun olaraq diplomatik və konsulluq binalarının və personalının toxunulmazlığına hörmət edilməsinin zəruriliyini xatırladıblar.