Bu, Rusiya-Ukrayna müharibəsinin başlanğıcından bəri qəbul edilən ən böyük sanksiya paketidir
Avstraliya Rusiya ilə əlaqəli 180 fiziki şəxsə, təşkilata və “kölgə donanması” gəmisinə qarşı əlavə sanksiyalar tətbiq edib. AYNA.AZ xarici mediaya istinadən bildirir ki, bu barədə ölkənin Baş naziri Entoni Albanese, müdafiə naziri Riçard Marles və xarici işlər naziri Penni Vonqun birgə bəyanatında qeyd olunub.
Bəyanatda bildirilib ki, bu, 2022-ci ilin fevral ayından, Rusiya-Ukrayna müharibəsinin başlanğıcından bəri Avstraliya tərəfindən qəbul edilən ən böyük sanksiya paketidir.
Bəyanatda deyilir: "Yeni sanksiyalar Rusiyanın maliyyə və bank sektorlarını, müdafiə sənayesini, aviasiyanı, neft və qazı, nəqliyyatı, elm və texnologiyanı hədəf alır. Onlar Rusiyanın gəlirlərini azaltmaq və qanunsuz və qəddar işğalını davam etdirmək qabiliyyətini daha da məhdudlaşdırmaq üçün nəzərdə tutulub".
Qeyd olunub ki, “kölgə donanması” gəmilərinə qarşı sanksiyalar Rusiyanı müharibə iqtisadiyyatından əldə edilən gəlirdən məhrum etmək məqsədi daşıyır. Avstraliya ilk dəfə olaraq sanksiyaları aşmaq üçün sərhədyanı ödənişləri asanlaşdıran kriptovalyuta qurumlarını da hədəfə alıb.
Bəyanatda həmçinin vurğulanıb ki, müharibənin əvvəlindən bəri Avstraliya Rusiyaya qarşı 1800-dən çox sanksiya tətbiq edib. Bundan əlavə, Avstraliya Rusiya neftinin qiymət limitini bir barel üçün 47,60 dollardan 44,10 dollara endirib.