Avropanın vaksinasiyaya hazırlığını və pandemiya zamanı sürətli reaksiyasını artırmaq üçün İtaliyanın Syena şəhərində Avropa Peyvənd Mərkəzi (EVH) açılıb.
AYNA.AZ xarici KİV-ə istinadən xəbər verir ki, bu barədə Avropa Komissiyasının (AK) böhranların idarə olunması üzrə üzvü Aca Labib bildirib.
“Avropa Peyvəndi Mərkəzinin işə salınması ilə biz Avropanın gələcək pandemiyalara tez və effektiv cavab verməyə hazır olmasını təmin etmək üçün əhəmiyyətli bir addım atırıq. Avropa həyat xilas edən peyvəndləri onlara ən çox ehtiyacı olanlara sürətlə çatdıra biləcəyimiz davamlı, sabit gələcəyə sərmayə qoyur”, - o deyib.
AK-nın məlumatında qeyd edilir ki, bu təşəbbüs özündə patogenin genomunun müəyyən edilməsindən dörd aydan az müddətə peyvəndin işlənib hazırlanmasını sürətləndirəcək əsas tədbirləri ehtiva edir.
Mərkəz Aİ səviyyəsində peyvənd tədqiqatı və işlənib hazırlanması üzrə üzv dövlətlər tərəfindən maliyyələşdirilən investisiyaları birləşdirəcək. Yeni tədqiqat mərkəzi Avropanın aparıcı peyvənd hazırlama təşkilatları və milli pandemiyaya hazırlıq proqramlarının konsorsiumu olacaq.
EVH layihəsi AK-nın Səhiyyədə Fövqəladə Hallara Hazırlıq və Onlara Reaksiya İdarəsi tərəfindən “EU4Health” proqramı vasitəsilə 102 milyon avro dəyərində maliyyələşdirilir.
Brüssel hesab edir ki, Avropada birgə tədqiqatlar təşkil edən mərkəzin çevik, mərkəzləşdirilməmiş strukturu sayəsində peyvəndin işlənib hazırlanmasında inqilab edəcək.