Bu ehtiyatları bərpa etmək altı ilə qədər vaxt apara bilər
ABŞ ordusu İrana qarşı əməliyyat zamanı 1000-dən çox uzun mənzilli “Tomahawk” raketindən istifadə edib. AYNA.AZ xəbər verir ki, bu barədə “The Wall Street Journal” (WSJ) ABŞ rəsmilərinə istinadən məlumat yayıb.
Nəşr həmçinin Vaşinqtonun “Patriot” və “Terminal High Altitude Area Defense” (THAAD) sistemləri də daxil olmaqla hava hücumundan müdafiə sistemləri üçün hazırlanmış 1500 ilə 2000 arasında vacib raket istifadə etdiyini yazıb.
Məqalədə vurğulanıb ki, bu ehtiyatları bərpa etmək altı ilə qədər vaxt apara bilər.
Yazıda iddia edilir ki, buna görə də ABŞ administrasiyası gələcək böhranlar üçün əməliyyat planlarının yenidən nəzərdən keçirilməsi ehtimalını müzakirə etməyə başlayıb.
Jurnalistlər bəzi ABŞ rəsmilərinin mövcud vəziyyəti nəzərə alaraq, Çinlə münaqişə halında ABŞ-ın Tayvanı müdafiə etmək planlarını tam şəkildə həyata keçirmək qabiliyyətinə şübhə ilə yanaşdıqlarını aşkar ediblər. Lakin məqalənin müəllifləri bunun yalnız qısamüddətli perspektiv olduğunu qeyd ediblər.