Beş ştatın 869 milyon dollarlıq sosial xidmət qrantlarına çıxışı dondurulub
Demokratların rəhbərlik etdiyi beş ABŞ ştatı ABŞ Prezidenti Donald Tramp administrasiyasına qarşı iddia qaldırıb. AYNA.AZ “Reuters”ə istinadən xəbər verir ki, bu addım uşaq baxımı və ailə yardımı üçün 10 milyard dollardan çox federal fondlara çıxışın dondurulması qərarına cavab olaraq atılıb.
Söhbət Kaliforniya, Kolorado, İllinoys, Minnesota və Nyu-York ştatlarından gedir. İddia ABŞ Səhiyyə və İnsan Xidmətləri Departamentinin əlavə araşdırma aparılana qədər fondlara çıxışı məhdudlaşdıracağını elan etməsindən sonra Manhetten federal məhkəməsinə verilib. Beş ştatın 869 milyon dollarlıq sosial xidmət qrantlarına çıxışı dondurulub.
Ağ Ev şərh tələbinə dərhal cavab verməyib.
Nəşrin məlumatına görə, ayrılan vəsaitlərə uşaqlı aztəminatlı ailələr üçün Müvəqqəti Yardım Proqramından 7,3 milyard dollar daxildir. Bundan əlavə, Uşaq İnkişafı və Qayğı Fondundan təxminən 2,4 milyard dollar da müzakirə mövzusudur.
Rəsmilər məhdudiyyətlərin ştatların sosial təminat proqramlarında geniş yayılmış fırıldaqçılıq və vergi ödəyicilərinin vəsaitlərindən sui-istifadə səbəbindən tətbiq olunduğunu izah ediblər. Səlahiyyətlilər, ABŞ vətəndaşı və ya daimi sakini olmayan qanunsuz müavinət alan şəxslərin olduğunu qeyd ediblər.