XİN “Sumud Global” Donanma gəmilərinin ələ keçirilməsini “piratçılıq aktı” adlandırıb
Türkiyə Xarici İşlər Nazirliyi (XİN) Qəzza zolağının dəniz blokadasını pozmağa cəhd edən “Sumud Global” Donanma gəmilərinin ələ keçirilməsini “piratçılıq aktı” adlandırıb və onları pisləyib.
AYNA.AZ-ın Türkiyə mediasına istinadən məlumatına görə, nazirlik bəyanatda bildirib ki, "İsrail qüvvələrinin beynəlxalq sularda Qəzzaya humanitar yardım çatdırmaq üçün yaradılan “Sumud Global” Donanmasına qarşı etdiyi hərəkətləri pisləyirik: “Bu, yeni bir piratçılıq aktıdır".
Nazirlik qeyd edib ki, "donanmada təxminən 40 ölkənin vətəndaşı var".
"İsrail hücumları və onun qorxutma siyasəti heç bir şəkildə beynəlxalq ictimaiyyətin ədalət və Fələstin xalqı ilə həmrəylik axtarışına mane olmayacaq. İsrail dərhal maneə törətməsini dayandırmalı və saxlanılan donanma üzvlərini qeyd-şərtsiz azad etməlidir", - deyə XİN bəyan edib.
Bəyanatda qeyd edilib ki, Türkiyə tərəfi "Türkiyə vətəndaşlarının vətənlərinə təhlükəsiz qayıtmasını təmin etmək üçün digər ölkələrlə əməkdaşlıq çərçivəsində lazımi tədbirlər görür".
XİN vurğulayıb ki, “beynəlxalq ictimaiyyəti İsrailin qanunsuz hərəkətlərinə qarşı dərhal vahid və qətiyyətli mövqe tutmağa çağırırıq”.