AQTA qaydalara əməl edilməsi ilə bağlı açıqlama verib
Azərbaycan Qida Təhlükəsizliyi Agentliyi (AQTA) sabahdan etibarən fəaliyyətə başlayacaq ictimai iaşə müəssisələrində qaydalara əməl edilməsi ilə bağlı açıqlama verib.
Agentlikdən AYNA-ya bildirilib ki, açıq havada fəaliyyət göstərəcək ictimai iaşə müəssisələrində mütəmadi dezinfeksiya işləri aparılmalı, hər bir masada dezinfeksiyaedici məhlulların yerləşdirilməsi təmin olunmalıdır.
Kafe və restoranlarda təmizlik-dezinfeksiya işləri iş saatı ərzində əsasən işlək sahələrdə (giriş-çıxış, kassa və s.), iş saatından sonra isə bütün sahələrdə həyata keçirilməli, müəssisə təmizlik vasitələri, dezinfeksiyaedici maddələrlə, axar isti və soyuq su təchizatı ilə daimi olaraq təmin edilməlidir.
“İşçi heyət hər zaman şəxsi gigiyena qaydalarına ciddi riayət etməlidir. Həmçinin onların dəyişəkli təmiz iş geyimi olmalıdır. Gün ərzində bir çox insanla təmasda olduqlarından qoruyucu vasitələrlə və dezinfeksiyaedici məhlulla təmin olunmalıdırlar”, - deyə Agentlikdən bildirilib.