Ruben Akopyan hakimiyyəti ələ keçirməyə çağırış ittihamı ilə iki ay müddətinə həbs edilib
Ermənistan Parlamentinin keçmiş deputatı, ölkənin Sankt-Peterburqdakı keçmiş baş konsulu Ruben Akopyan hakimiyyəti ələ keçirməyə çağırış ittihamı ilə iki ay müddətinə həbs edilib. AYNA.AZ erməni mediasına istinadən bildirir ki, bu barədə onun oğlu Samvel Akopyan məlumat verib.
Siyasətçinin oğlu sosial şəbəkədə Ermənistan hakimiyyətinə müraciət edərək, "Atam iki ay həbs edildi... Bunun cavabını verəcəksiniz! Hakimiyyət əbədi deyil", - yazıb.
Bundan əvvəl Ermənistan İstintaq Komitəsi Akopyanın həbs olunduğunu açıqlamışdı. O hökumətin devrilməsinə açıq çağırışlarda ittiham olunur. İstintaqın fikrincə, siyasətçiyə qarşı belə ittihamların irəli sürülməsinə əsas iyulun 1-də dərc olunmuş müsahibə olub.
Beş hüquq müdafiəçisinin təşəbbüsü ilə bəyanat verilib və vurğulanıb ki, müxalif siyasətçi Akopyanın cinayət təqibi söz azadlığının boğulmasının növbəti təzahürüdür.
"Akopyana bir neçə həftə əvvəl verilən və gələcəyə deyil, keçmişə aid siyasi qiymətlərə görə ittiham irəli sürülüb. Bu şəraitdə nə linqvistik, nə də hüquqi nöqteyi-nəzərdən sağlam məntiq çərçivəsində "hərbi çağırış" fenomenindən danışmaq mümkün deyil", - hüquq müdafiəçilərinin bəyanatında qeyd edilib.
2025-ci il iyulun 18-də Akopyana qarşı Ermənistan Cinayət Məcəlləsinin 422-ci maddəsinin 2-ci hissəsi (KİV vasitəsilə hakimiyyəti zorla ələ keçirməyə və konstitusiya quruluşunu devirməyə çağırışlar) ilə ictimai cinayət işi başlanıb. O, həmin gün saxlanılıb.
Akopyan dörd çağırış Ermənistan Parlamentinin deputatı olub. 2000-2008-ci illərdə Ermənistanın Sankt-Peterburqdakı baş konsulu vəzifəsini tutub.