“Xarici İşlər Nazirliyində bir “köstəbək” var və o, danışıqların detallarını sızdırır”
Azərbaycan qalib ölkədir, buna görə danışıqlarda şərtləri diktə edən Bakı olacaq. Bu fikri Cənubi Koreyanın Hankuk universitetinin professoru, politoloq Rövşən İbrahimov AYNA-ya açıqlamasında səsləndirib.
Bakı ilə İrəvan arasında sərhədlərin delimitasiyası və demarkasiyası barədə mümkün müqavilənin imzalanmasını şərh edən ekspert bildirib ki, hazırda ölkələr arasında bir sənədin imzalanacağı barədə məlumatlar Ermənistan sosial şəbəkələrindən və ya onların mediasından gəlir: “Buna görə də, yalnız Ermənistanın Baş naziri əvəzi Nikol Paşinyanın istəyinə güvənirik. Yəni danışıqlar aparılır və oxşar sənədlər imzalana bilər. Burada təəccüblü bir şey yoxdur, çünki 10 noyabr bəyanatı bir çərçivə sazişidir və kommunikasiyaların açılması və qurulması əlavə hüquqi sənədlər tələb edir”.
Sabiq Prezident Sarkisyanın kürəkəni tərəfindən dərc olunan sənədə gəldikdə, analitik bunun Ermənistan müxalifəti tərəfindən saxtalaşdırılma olduğuna inanır: “Çünki sənədin özündə üslub səhvləri var. Düşünürəm ki, həqiqi sənəddə bu qədər səhv ola bilməz. Və Paşinyan diqqəti əsl sənəddən yayındırmaq üçün təsdiqləmiş ola bilər. Lakin bu sənədin və məqamların əvvəl oxuduğumuza yaxın olduğu inkar edilməməlidir”.
“Ancaq hər halda sənədin Azərbaycanın milli maraqlarına uyğun olaraq imzalanacağını anlamalısınız. Müharibəni qazandıq, buna görə şərtləri biz təyin edə bilərik, onlar yox”, - deyə İbrahimov vurğulayıb.
Paşinyan seçkilərdə məğlub olarsa, imzalanmış müqavilələrə yenidən baxılmasının mümkünlüyündən danışan müsahibimizin sözlərinə görə, Ermənistan təkbaşına qərar vermək səviyyəsində müstəqil bir ölkə deyil: “Yəni Köçəryan özü o zaman keçmiş Rusiya rəhbərliyinin əmrini yerinə yetirirdi. Buna görə də Rusiyanın gözləntiləri və kommunikasiyaların açılmasını həyata keçirmək istəyi varsa, İrəvanda hakimiyyət kimin olmasından asılı olmayaraq, onlar reallaşacaq”.
Mövzunu AYNA-ya şərh edən politoloq İlqar Vəlizadə hesab edir ki, danışıqların pozulmaması üçün Azərbaycan adətən bilərəkdən hansı danışıqların aparıldığı və hansı sənədlərin imzalanacağı barədə əvvəlcədən məlumat vermir: “Ermənistanda bu, daxili siyasi məqsədlər üçün edilir, kimsə bu sənədləri Minasyana sızdırdı və o, ictimaiyyətə açıqladı. Bu hal dövlət institutlarının hansı vəziyyətdə olduğunu göstərir. Bu sənədləri biz gizli saxlayırıq. Amma Ermənistan Xarici İşlər Nazirliyində Paşinyanı sevməyən bir “köstəbək” var. Ümumiyyətlə, icra orqanlarında Paşinyana qarşı olanlar çoxdur”.
Mütəxəssisin fikrincə, bu məlumatlar üçün yaxşı pul ödənilir: “Üstəlik Köçəryanla birgə qisas ümidi də alovlanmaqda davam edir. Onu da deməliyəm ki, Paşinyan hər yerdə təmizləmələr təşkil etsə də, bu, heç nəyə səbəb olmadı. O, eyni oyun kartları dəstəsini qarışdırır, çünki başqa kartlar yoxdur. Bu səbəbdən belə sızmalar baş verir. Belə bir sənəd imzalanarsa, Qazağın işğal olunmuş 7 kəndini və Naxçıvanın Kərki kəndini əldə edəcəyik və bu prosesin davamı əlimizə oynayacaq”.
Vəlizadə onu da qeyd edib ki, bu işdə Azərbaycanın hansısa güzəştlərə getməsi ilə bağlı ölkəmizdə də fərziyyələr yayılmaqda davam edir: “Artıq fərziyyələr mövcuddur ki, Azərbaycan təxribatçılarla bağlı müəyyən güzəştlərə getdiyi üçün bəzi digər detallarda da güzəştlər ola bilər. Azərbaycanın hər hansı bir güzəştə getməsinin aydın səbəbləri yoxdur. Gec-tez Xankəndidə Azərbaycanın yurisdiksiyası qurulacaq, sülhməramlılar gedəcək və yerli özünüidarəetmə orqanları Bakı ilə koordinasiya ediləcək”.
“Kommunikasiyaların deblokadasına gəldikdə, başa düşməlisiniz ki, söhbət həm Azərbaycanın xaricində, həm də daxilindəki bütün kommunikasiyaların deblokadasından gedir. İndi bütün kommunikasiyaların açılmasının vacibliyində israr edirik, belə ki, yüklərin Ağdərədən Kəlbəcərə Rusiya konvoyunun müşayiəti ilə getməsi normal deyil”, - deyə politoloq fikrini yekunlaşdırıb.