Dəyişikliklər parlament tərəfindən qəbul edilərsə, onlar gələn il qüvvəyə minəcək
Rusiya tərəfindən artan təhlükəyə cavab olaraq, Britaniya hökuməti ehtiyatda olan keçmiş hərbçilərin səfərbərliyə məruz qalma yaşını artırmağı, eləcə də ehtiyatda olanların səfərbər oluna biləcəyi hərbi təhlükə səviyyəsini aşağı salmağı planlaşdırır.
AYNA.AZ BBC-yə istinadən bildirir ki, radionun baş siyasi müxbiri Henri Zeffmanın sözlərinə görə, bu dəyişikliklər Britaniya Parlamenti tərəfindən tezliklə dərc olunacaq qanun layihəsinə daxil ediləcək.
Hökumət bu dəyişiklikləri Britaniyanın mümkün hərbi münaqişəyə hazırlığında mühüm element hesab edir.
Hazırda silahlı qüvvələrdən ayrılan Britaniya hərbçiləri 55 yaşına qədər "strateji ehtiyat" kimi tanınan hissənin bir hissəsi hesab olunurlar. Hökumət bu yaş həddini 10 il artıraraq 65-ə çatdırmaq niyyətindədir.
Mövcud qanuna əsasən, bütün ehtiyatda olanlar yalnız ciddi təhlükə - qanunda "dövlət üçün təhlükə, böyük fövqəladə vəziyyət və ya Birləşmiş Krallığa hücum" kimi müəyyən edildiyi təqdirdə səfərbərliyə məruz qalırlar.
Hökumət bu həddi aşağı salmaq və düşmən "döyüş hazırlıqları" aparırsa, istənilən yaşda ehtiyatda olan əsgərləri çağırmaq səlahiyyəti vermək niyyətindədir.
Hazırda bu təhdid səviyyəsində qanun yalnız son bir neçə ildə ehtiyatdan tərxis olunmuş şəxslərin səfərbər edilməsinə icazə verir.
Əgər bu dəyişikliklər parlament tərəfindən qəbul edilərsə, onlar gələn il qüvvəyə minəcək.