“Axios”: Azərbaycan Ermənistanla imzalanan sülh sazişindən sonra ABŞ-la daha sıx əlaqələr qurmaq istəyir
Azərbaycan Donald Tramp administrasiyasının vasitəçilik etdiyi sülh bəyannaməsindən sonra milli təhlükəsizlik və texnologiya sahəsində ABŞ ilə daha sıx əlaqələr qurmaq istəyir. AYNA.AZ xəbər verir ki, bu barədə “Axios” portalı yazıb.
"Azərbaycan dünyanın ən iti “tikanlarından” ikisi olan Rusiya və İran arasında sıxışıb qalıb. O həm də əsas neft və qaz ixracatçısıdır və yaxşı təchiz olunmuş orduya malikdir. Ölkənin Amerika ilə əməkdaşlıq tarixi var, o cümlədən terrorla qlobal mübarizə zamanı uçuşlar və yanacaq doldurma dayanacaqları təmin etmək baxımından. Lakin Azərbaycanın uzun müddət davam edən münaqişə tarixi qonşu Ermənistanla diasporada iz qoyub”, - media orqanı vurğulayıb.
Azərbaycanın ABŞ-dakı səfiri Xəzər İbrahim “Axios”a müsahibəsində bildirib ki, Azərbaycan hökuməti bundan sonra "işçi qrupları yaratmaq və bütün sahələrdə əlaqələri inkişaf etdirmək üzərində işləyəcək: iqtisadiyyat, enerji, müdafiə, siyasət, təhsil, texnologiya, süni intellekt.
“Gəlin yeni səhifə açaq. Təkcə Ermənistan-Azərbaycan münasibətləri üçün deyil, həm də Azərbaycan-Amerika münasibətləri üçün birlikdə çalışaq”, deyə X.İbrahim deyib.
Diplomat sülh prosesini irəli aparan ABŞ Prezidenti Donald Trampa təşəkkür edib və bildirib ki, Tramp “101 faiz” Nobel Sülh Mükafatına layiqdir.
"Bu çox qısa müddət ərzində - təxminən altı ayda başqalarının 30 ildən artıqdır edə bilmədiyi bir şeyi edə bildi", - səfir vurğulayıb.
X.İbrahim həmçinin Ağ Evin xüsusi elçisi Stiv Uitkoffa təşəkkürünü bildirib və deyib ki, “onun rolunu görməmək olmaz”.
"İstənilən danışıqlarda, xüsusən də çox çətin sülh danışıqlarında çox güclü dünya liderinin çox güclü siyasi iradəsinin olması həmişə vacibdir. Bu dəfə əldə etdiyimiz budur", İbrahim bildirib.
ABŞ rəsmilərindən biri “Axios”a deyib ki, Tramp administrasiyasına rəğbət bəsləmək Azərbaycanın sülh sazişini imzalamaq üçün əsas motivasiyası kimi görünür.