Özbəkistanın Gömrük Komitəsi ABŞ Sərhəd və Gömrük Xidməti ilə əməkdaşlıq və qarşılıqlı yardım haqqında saziş imzalayıb
Rusiyaya qarşı sanksiyalar sərtləşməyə davam edir. Rusiyaya paralel idxal və ikili təyinatlı malların tədarük edildiyi başqa bir ölkə ABŞ-la gömrük məlumatlarının mübadiləsinə razılıq verib. Belə ki, Qazaxıstanın ardınca Özbəkistanın Gömrük Komitəsi sentyabrın 13-də ABŞ Sərhəd və Gömrük Xidməti ilə əməkdaşlıq və qarşılıqlı yardım haqqında saziş imzalayıb. Bu, 32 il əvvəl ABŞ ilə Özbəkistan arasında diplomatik münasibətlərin qurulmasından sonra bu formatda ilk görüş olub ki, bu da ABŞ-ın belə saziş imzaladığı 18-ci ölkədir.
Bundan sonra xarici iqtisadi fəaliyyət üzrə məsləhətçilər müştərilərə Özbəkistan üzərindən işləməyin mümkün fəsadları barədə xəbərdarlıq etməyə başlayıblar. Belə bir xəbərdarlıq almış bir neçə şirkətin əməkdaşları “The Moscow Times”a bildiriblər.
Saziş Özbəkistan tərəfindən gömrük xidmətlərinin rəqəmsallaşdırılmasında ABŞ-ın yardımını, iki ölkənin gömrük xidmətləri arasında məlumat mübadiləsini, o cümlədən narkotiklərin qanunsuz dövriyyəsi, insan alveri, transmilli cinayətkarlıq, çirkli pulların yuyulması və s. gömrük rüsumundan yayınmanın aradan qaldırılmasını nəzərdə tutur.
Əslində bu o deməkdir ki, ABŞ hakimiyyəti Özbəkistandan keçən ixrac-idxal axınları haqqında böyük həcmdə məlumat alacaq və Rusiya ilə əlaqəli şirkətlər üçün bu vəziyyət böyük problemlər yarada bilər, - ödəniş agenti şirkətinin rəhbəri belə deyib.
“2022-ci ildən Özbəkistan Qərbin sanksiyalarından yan keçmək üçün əsas olmasa da, mühüm vasitəçi ölkəyə çevrilib”, deyə o fikrinə davam edib.
Bildirib ki, Özbəkistan vasitəsilə bu cür əməliyyatların aparılması Avrasiya İttifaqı ölkələri ilə müqayisədə daha az sərfəlidir, lakin hələ də mümkündür. Çünki ölkənin hakimiyyət orqanları və maliyyə sistemi indiyə qədər Rusiyaya böyük sədaqətlə yanaşır. Onun şirkətində Özbəkistan sifarişlərin təxminən 15%-də hansısa şəkildə zəncirə daxil edilib.
“The Moscow Times”ın həmsöhbəti ehtiyat edir ki, razılaşmadan sonra Özbəkistan Rusiyanın paralel idxalını məhdudlaşdırmaq üçün ABŞ-la fəal şəkildə münasibətləri yaxşılaşdırmağa çalışan Qazaxıstanın artıq atdığı eyni tədbirləri görə bilər. Bu, ikili təyinatlı malların tranzitinə qadağa və xüsusi lisenziya olmadan bir neçə kateqoriyalı malların idxalına qadağa və ödənişlərə məhdudiyyətlərdir.