ABŞ Prezidenti Donald Trampın İrana “maksimum təzyiq” siyasəti dalana dirənib
Ağ Evin mətbuat katibi Karolayn Levitt Milli Təhlükəsizlik Şurasında, Xəzinədarlıq Departamentində və Dövlət Departamentində yüksək vəzifəli rəsmilərə İrana qarşı sanksiyaların tətbiqi ilə bağlı bütün işlərin dayandırıldığı barədə məlumat verildiyini açıqlayıb. AYNA.AZ xəbər verir ki, bu barədə “The Wall Street Journal” Ağ Evə yaxın mənbəyə istinadən məlumat yayıb.
Agentliyin mənbəsinin sözlərinə görə, ABŞ Prezidenti Donald Trampın İrana “maksimum təzyiq” siyasəti dalana dirənib. Siyasətçi bu strategiyadan ilk prezidentlik dövründə (2017-ci ildən 2021-ci ilə qədər) istifadə edib və yanvarda Ağ Evə qayıtdıqdan sonra onu bərpa edib.
Ağ Evin mətbuat katibinin müavini Anna Kelli nəşrlə söhbətində bu məlumatı təkzib etməyib və əlavə edib ki, sanksiyalarla bağlı istənilən yeni qərar ya Tramp administrasiyası, ya da “müvafiq qurumlar” tərəfindən açıqlanacaq.
Vaşinqton sonuncu dəfə 2025-ci ilin may ayının ortalarında davam edən nüvə danışıqları fonunda İrana qarşı genişləndirilmiş sanksiyaları elan edib. Agentliyin məlumatına görə, Xəzinədarlıq Departamenti ən azı üç dəfə daha sərt tədbirləri elan etməyi təxirə salıb.