Yaşar Kamalın işdən çıxarılmasının səbəbi açıqlanıb – RƏSMİ

Mədəniyyət

15.02.2023 - 13:06

““Kinokitab” verilişi AzTV-nin məhsulu deyil, prodakşn istehsalıdır”

“Azərbaycan Televiziya və Radio Verilişləri” QSC-dən (AzTV) dublyaj aktyoru Kamal Yaşarın işdən çıxarılmasına münasibət bildirilib.

AYNA “Report”a istinadən bildirir ki, televiziyadan verilən məlumata görə, “Mədəniyyət” kanalının “Kinokitab” verilişi hələ ötən ilin sentyabrından yayımlanmırdı və verilişin keyfiyyət baxımından müasir tələblərlə uyğunlaşmadığı da yaradıcı kollektivə izah edilib.

“Bu il kollektivə daha bir imkan verilsə də, reytinq toplamadığı üçün yayımının dayandırılmasına qərar verildi. Bunu hansısa açıqlama və paylaşımla əlaqələndirmək fikri başqa istiqamətə yönləndirməkdən, süni ajiotaj yaratmaqdan başqa bir şey deyil. Onu da əlavə edək ki, “Kinokitab” verilişi “Azərbaycan Televiziya və Radio Verilişləri” QSC-nin məhsulu deyil, prodakşn istehsalıdır. Verilişin ərsəyə gəlməsində də əməyi olan şəxslər “Mədəniyyət” kanalının əməkdaşları yox, kənar müəlliflərdir”, - AzTV-dən bildirilib.

Qeyd edək ki, aktyor ötən gün sosial şəbəkə vasitəsilə müraciət yaymışdı.

Müəllif: Ayna.az