Keyn hövzəsi populyasiyasında 61 ayıdan 31-ində dərin cırıqlar, xoralar və kəsiklər aşkarlanıb
Sietldəki Vaşinqton Universitetinin amerikalı alimləri Arktikada dəyişən iqlimin qütb ayılarının pəncələrini zədələdiyini aşkar ediblər. Onların pəncələrindəki dərin kəsiklər böyük buz böyümələri ilə örtülüb. Araşdırma "Ecology" elmi jurnalında dərc olunub.
Alimlər Kanada və Qrenlandiyada 70° şimal enindən yuxarıda yaşayan iki qütb ayı populyasiyasının üzərində təcrübə apardıqdan sonra bu nəticəyə gəliblər. Məlumatlar 2012-2022-ci illər arasında aparılan ekspedisiyalar zamanı əldə edilib.
Keyn hövzəsi populyasiyasında 61 ayıdan 31-ində dərin cırıqlar, xoralar və kəsiklər aşkarlanıb.
Şərqi Qrenlandiyadan olan 124 heyvandan 15-ində oxşar xəsarətlər qeydə alınıb.
Alimlər qütb ayılarının pəncələrində buzun yığılmasının üç mümkün səbəbini irəli sürürlər ki, bunların hamısı iqlimin istiləşməsi ilə bağlıdır.
Müəyyənləşdirilib ki, tez-tez yağan yağışlar nəm yaradır, yaş qarın əmələ gəlməsinə səbəb olur. Bu da ayıların pəncələrinə yapışır və hava soyuyanda donur.
İkinci ehtimal odur ki, daha isti dövrlər səthdəki qarın əriməsinə və sonra yenidən donaraq sərt qabığın əmələ gəlməsinə səbəb olur. Ağır qütb ayıları bu buz qabığının içindən keçərək pəncələrini onun iti kənarlarında zədələyirlər.
Son ehtimal olunan səbəb ayıların yaşayış yerlərində dəniz buzunun vəziyyətindəki dəyişikliklərlə bağlıdır. İstiləşmə temperaturu buzun incəlməsinə səbəb olur və suyun qarın içinə sızmasına imkan verir. Yaş qar heyvanların pəncələrinə yapışır və birinci ssenaridə təsvir olunduğu kimi donur.