Sosial Tədqiqatlar Mərkəzinin prioritetləri açıqlanıb

Cəmiyyət

24.09.2019 - 14:12

Zahid Oruc: “Prezident bəyan etmiş oldu ki, o, hər zamankı kimi xalqın dövlətini bərqərar etməkdə qərarlıdır”

 

Bu gün Sosial Tədqiqatlar Mərkəzi (STM) “Prezidentin sosial və kadr islahatları ictimai rəydə” mövzusunda konfrans keçirib və eyni zamanda tədbirdə www.stm.az saytının təqdimatı baş tutub. AYNA xəbər verir ki, tədbiri giriş sözü ilə açan STM İdarə Heyətinin sədri, millət vəkili Zahid Oruc Mərkəzin yaradılması ideyası barədə çıxış edib. O, STM-nin əsas tezislərini bölüşüb və onun missiyası, vəzifələrindən söz açıb.

 

“2019-cu ilin başlanması ilə ölkəmizdə həyata keçirilən “Yeni Kurs”un başlıca konturlarını müəyyənləşdirməyə çalışdığımız zaman hər birimiz üçün son dərəcə taleyüklü çağırışlar meydana çıxıb. Burada ilk növbədə, Prezident İlham Əliyevin rəhbərliyi ilə 12 yanvar 2019-cu ildə keçirilən müşavirənin tarixi əhəmiyyəti və yeni mərhələyə keçidin əsas konsepsiyasının üzərində dayanmaq yerinə düşərdi. Cənab İlham Əliyevin ilin əvvəlində elan etdiyi yeni siyasət kursu islahatların strukturuna, əhatə dairəsinə və hədəflərinə görə əvvəlki illərdən xeyli fərqlənirdi. Bəli, islahatlar sayəsində bugünkü cəmiyyətimiz 10, 20, 30 il əvvəlki illərdəki vəziyyətdən sadəcə xronoloji hesab edilən müddətlə fərlənmirdi, burada fədakarlıqla görülən quruculuq işləri yaşadığımız yeni gerçəklikləri - nəhəng infrastrukuturun formalaşmaşmasını, transmilli layihələrin gətirdiyi gəlirlərin ölkəmizin bütün sahələrində yaratdığı keyfiyyət dəyişikliklərini inkarolunmaz gerçəkliyə çevirdi. Həqiqət bundan ibarətdir ki, tarixi hadisələrin düzgün qiyməti zaman keçdikcə verilir. Bizə görə söhbət qətiyyən əvvəlki illərin üzərinə kölgə salmaqdan, ondan imtina edilməsindən getmir, əksinə dövlətimizin iqtisadi-siyasi gücünü müəyyən edən bütün uğurları qoruyub saxlamaqla quruculuğun yeni modeli irəli sürülür, problemləri həll etməyin fərqli yolları elan olunurdu”, - deyə Z.Oruc bildirib.

Ayna.az