Ali Baş Komandan: “Biz Şuşanı döyüş meydanında qazandıq”

Aktual

08.11.2020 - 13:10

İlham Əliyev: “Biz xalqımızın, əsgərlərimizin canı, qanı bahasına torpaqlarımızı işğalçılardan azad edirik”

 

“Şuşa azaddır və biz artıq Şuşaya qayıtmışıq”. AYNA xəbər verir ki, bunu Azərbaycan Respublikasının Prezidenti, Ali Baş Komandan İlham Əliyev Şəhidlər Xiyabanından xalqa müraciətində bəyan edib.

 

Prezident bildirib ki, biz Şuşanı döyüş meydanında qazandıq: “Bu tarix əbədi yaşayacaq. Bu bizim şanlı qələbəmizin, zəfərimizin günüdür. Biz bunu danışıqlar masası arxasında yox, döyüş meydanında qazandıq. Bütün bəyanatlara rəğmən Ermənistan-Azərbaycan Dağlıq Qarabağ münaqişəsinin hərbi yolları vardır. Mən bunu dəflərlə demişdim. 30 ilə yaxındır mənasız danışıqlar heç bir nəticə vermədi. 30 il bizim əzəli torpaqlarımız işğal altında qaldı. Ermənistan tərəfi danışıqlarla sadəcə vaxt qazanmaq istəyirdi. Lakin, qətiyyət, cəsarət göstərdik və Azərbaycan xalqının maraqlarına cavab verməyən heç bir razılaşmaya getmədik. Bütün beynəlxalq kürsülərdə bəyan etmişdimki, Azərbaycanın ərazi bütövlüyünün bərpa edilməsi bizim əsas məqsədimizdir. Biz bu vəzifəni icra etdik və icra edirik. Şuşada yenidən azan səsi eşidiləcək!”.

 

“Biz döyüş meydanında qazandığımız qələbədə şəhidlər verdik. Allah bütün şəhidlərimizə rəhmət eləsin. İstər birinci Qarabağ, istər ikinci Qarabağ Vətən müharibəsi adlandırdığımız müharibədə şəhid olan əsgərlərimizə rəhmət, ailələrinə səbr diləyir. Yaralı soydaşlarımıza Allahdan şəfa diləyirəm. Biz xalqımızın, əsgərlərimizin canı, qanı bahasına torpaqlarımızı işğalçılardan azad edirik. Biz bu işğalçıları torpaqlarımızdan qovuruq və qovacayıq”, - deyə Prezident qeyd edib.

Müəllif: Ayna.az