Erməni dumandan çıxdı: Azərbaycan onları erməni tərəfə qaytarmamalıdır?
Erməni təbliğatı anti-Azərbaycan əhval-ruhiyyəsini alovlandırmaqda davam edir. Beləliklə, erməni mediası Azərbaycanın Zəngəzuru (onlar Sünik adlandırır) ələ keçirmək niyyətində olduğunu iddia edir, sərhəd kəndlərinin sakinlərinin mülkləri və canları üçün qorxusunu dilə gətirir.
Bu fonda, “Sputnik Ermənistan” nəşri Xocavənd (Martuni) şəhər sakininin ölü tapılması barədə təxribat xarakterli xəbər yayımladı. Şəhərin “meriyasından” verilən məlumata görə, yerli sakin Ararat Xaçatryan əlverişsiz hava şəraiti üzündən itkin düşərək, Azərbaycanın nəzarətində olan ərazidə qalıb və bir neçə gün sonra ölü tapılıb.
“Gecə idi, ətrafı duman bürümüşdü və o yolu qarışdırdı. Bir neçə gün sonra öldürüldü və Qızıl Xaç vasitəsilə bizə təslim edildi. Nə baş verdiyini bilmirik”, - deyə “meriyadan” bildiriblər.
Bu məlumat cavablardan daha çox sual doğurur. Ararat Xaçatryan gecə evdən kənarda nə edirdi? Yerli sakin ona çox tanış olmalı olan bir ərazidə necə itdi? Onu kim və hansı şəraitdə öldürdü? Təəssüf ki, bu təfərrüat “Sputnik Ermənistan”-ın xəbərində verilmir, lakin “DQR”-in “insan hüquqları müdafiəçisi” Artak Beqlaryanın hadisə ilə bağlı xəbərdar edildiyi qeyd olunur. Maraqlıdır, o, nə edəcək ki?
Ümumiyyətlə, itkin düşmüş şəxslərin olması halında, bu barədə müvafiq strukturlara məlumat verilir. Bu vəziyyətdə müvafiq struktur Rusiyanın sülhməramlı kontingenti hesab edilir. Ancaq “Sputnik Ermənistan”-ın məlumatları oxucuların diqqətini duman içində itən Xaçatryanın öldürülməsi faktına yönəldir və bir çox sualları cavabsız qoyur. Bu da öz növbəsində xəbər təqdimatının qərəzli və üstəlik təxribat xarakterli olmasından xəbər verir.
İşğalın davam etdiyi 30 ilə yaxın müddətdə həm Dağlıq Qarabağ zonasında, həm də ondan kənarda ermənilərin Azərbaycan-Ermənistan sərhədini keçərək, bizim tərəfə gəlməsi barədə onlarla fakt var. Ermənistanda bunların hamısının ruhi sağlamlıq problemi olan insanlar olduğu elan edildi. Erməni məntiqinə görə, sərhədi ya dəlilər keçirlər, ya da duman içində yol azanlar. Ermənilərin məntiqinə görə, bu şəxslər apriori təxribatçı və ya casus ola bilməzlər. Azərbaycan bu şəxsləri Ermənistan hakimiyyətinə təhvil verdikdən sonra, onlar hər zaman Bakını bu şəxslərə işgəncə verməkdə günahlandırıblar.
Hətta, bu ilin oktyabr ayının sonunda Azərbaycan tərəfindən geri qaytarılan, 85 yaşlı Hadrut şəhər sakini Yevgeniya Babayan da bizim tərəfdə olarkən, digər ermənilərə qarşı “işgəncə və qeyri-insani yanaşma” gördüyünü danışdı. Qadın onun gözlərin önündə “Azərbaycan polisinin yaşlı bir erməninin qollarını qırdığını, başına torba keçirilən bir gənc oğlanı təpiklədiyini və daha sonra hər iki kişinin boğazını kəsdiyini” gördüyünü iddia edirdi.
Maraqlıdır, belə “vəhşilik” edən polislər, nə əcəb bu qadına toxunmayıblar? Və bu “dəhşətli” səhnələri görəndə Yevgeniya Babayan ağlını itirməyib...
Bu baxımdan məntiqi bir sual ortaya çıxır: Azərbaycan “dumanda itən”, öz əcəli ilə ölən, meşə və dağlarda yırtıcıların hücumuna məruz qalan və ya COVID-19-un qurbanı olan ermənilərlə nə etməlidir? Axı, istənilən şəraitdə onların sağ və ya ölü qaytarılmasından asılı olmayaraq, şübhəsiz ki, Azərbaycan günahlandırılacaq.
Erməni əsgərlərinin hələ də Hadrut bölgəsinin meşələrində gizləndiklərini, bir neçə hərbçimizi şəhid etdikləri bəllidir. Yuxarıda göstərilənləri nəzərə alaraq, bu əsgərlər təslim olarsa və ya müqavimət göstərərkən öldürülürsə, Azərbaycan onları Ermənistan tərəfinə qaytarmamalıdır. Çünki Ermənistan Azərbaycanı “qeyri-insani rəftar və işgəncə”də günahlandıracaq. Bəlkə, bu bezdirici valı dəyişəsiniz?