Forumun sonuncu günündə kitabın fərdi və sosial həyat əhəmiyyəti məsələsinə dair panel müzakirə aparılıb
Mədəniyyət Nazirliyi və Heydər Əliyev Fondunun birgə təşkilatçılığı ilə ilk dəfə keçirilən "Azərbaycan Dili və Ədəbiyyatı" Forumu başa çatıb.
AYNA APA-ya istinadən xəbər verir ki, ölkənin tanınmış ədəbiyyatşünaslarının, yazıçı və şairlərinin, həmçinin dilçi alimlərinin, filoloqların iştirak etdiyi forumun sonuncu günündə kitabın fərdi və sosial həyat əhəmiyyəti məsələsinə dair panel müzakirə aparılıb.
Paneldə Xalq yazıçısı Çingiz Abdullayev, yazıçı Əkbər Qoşalı, Milli Kitabxananın direktoru Kərim Tahirov və digərləri çıxış ediblər.
Xalq yazıçısı Çingiz Abdullayev kitab nəşri məsələsindəki problemlərdən danışıb. O, bu yöndə hazırkı durumun ürəkaçan olmadığını qeyd edib.
Milli Kitabxananın direktoru Kərim Tahirov isə kənd kitabxanalarındakı problem və qayğısızlıq məsələsinə toxunub.
Ardından panel müzakirələrdə davam etdirilib.
Xatırladaq ki, forumun açılışı 1 sentyabrda Şamaxıda olub. Açılış günündə mədəniyyət naziri Adil Kərimli, elm və təhsil naziri Emin Əmrullayevlə yanaşı, bir sıra dövlət və hökumət nümayəndələri çıxışlar edib.
Forumun ilk günündə qloballaşmanın dilə təsiri və müasir ədəbi trendlər barədə geniş müzakirələrə həsr olunmuş iki panel olub.
Sentyabrın 2-də isə Bakıda - Gülüstan sarayında forumun ikinci günü baş tutub.
Burada kino və teatrla ədəbiyyatın əlaqəsi, həmçinin uşaq ədəbiyyatının müasir vəziyyəti ilə bağlı panellər olub.
Nəhayət, forumun üçüncü günündə isə kitabın fərdi və sosial təsiri məsələsi müzakirə mövzusu olub.
Bununla da, 3 gün davam edən "Azərbaycan Dili və Ədəbiyyatı" Forumu öz işini başa vurub.
Qeyd edək ki, Mədəniyyət Nazirliyi və Heydər Əliyev Fondu tərəfindən bundan öncə Teatr və Kino Forumları keçirilib.
Sözügedən tipli forumların davam edəcəyi gözlənilir.