Manatla bağlı proqnoz

İqtisadiyyat

30.12.2019 - 14:48

"Dünya bazarlarında neftin qiyməti kəskin ucuzlaşmazsa və ölkədə siyasi gərginlik baş verməzsə, gələn il də manatın məzənnəsində ciddi dəyişiklik baş verməyəcək" 

 

Mərkəzi Bank 2020-ci il və ortamüddәtli dövr üçün pul vә maliyyә sabitliyi siyasәtinin әsas istiqamәtlәri barәdә Bəyanatı ilə tanış olduqda diqqəti çəkən əsas məqam gələn il inflyasiya təzyiqinin artması narahatçılığıdır. Mərkəzi Bank 2020-ci ildә inflyasiyanın 4±2% dәhlizindә saxlayacağına çalışacağını qeyd etsə də narahatçılığını gizlətmir.

 

Bu narahatçılıq xarici amillərlə yanaşı daxili amillərə də əsaslanır. Xarici amillər olaraq, əsasən ticarət müharibələri fonunda neftin ucuzlaşması riskidirsə, daxil amillər olaraq fiskal aktivlik vә istehlak kreditlәrinin artımı göstərilir. Bu, həm də Mərkəzi Bank tərəfindən yola saldığımız ildə maaş və pensiyalarda baş vermiş artımın inflyasiya təzyiqi yaradacağının etirafıdır. Halbuki ekspertlərin bu fikrini hökumət qəbul etmirdi. İnflyasiyaya təsir edən amillərdən biri də istehlak kreditləridir. Ümumi kredit qoyuluşunda istehlak kreditlərinin payı artıq 50%-i ötüb və bu, təhlükəlidir.

 

Belə çıxır ki, banklarımız xarici sahibkarların biznesini və əhalinin tələbatını dəstəkləyir. Məhz əhali istehlakının artımı ölkədə iqtisadi artımın əsas drayveri olub.

 

Mərkəzi Bank manatın məzənnəsinin sabitliyini idxaldan asılı olan iqtisadiyyatımızda inflyasiya təzyiqini azaldan əsas amil kimi görür. Bu baxımdan gözlənilməz hadisə baş verməzsə, yəni dünya bazarlarında neftin qiyməti kəskin ucuzlaşmazsa və ölkədə siyasi gərginlik baş verməzsə, gələn il də manatın məzənnəsində ciddi dəyişiklik baş verməyəcək.

 

Eyni zamanda Mərkəzi Bank 2020-ci ildə uçot dərəcəsinin azaldılması məsələsinə konservativ yanaşacaq. Böyük ehtimalla bir müddət uçot dərəcələrinin sabitliyinə üstünlük verəcək, sonra onun artırılması da istisna deyil.

 

Samir Əliyev, iqtisadçı-ekspert

Müəllif: Ayna.az