Yanvaraın 27-də Naxçıvan Muxtar Respublika Ali Məhkəməsinin Cinayət Kollegiyasında hakim Vera Kuimovanın sədrliyi ilə həbsdə olan AXCP fəalı Zeynalabdin Bağırzadənin yanvarın 19-da Naxçıvan şəhər Məhkəməsinin çıxardığı qərardan verdiyi apellyasiya şikayəti üzrə məhkəmə prosesi keçirilib. Prosesdə Naxçıvan şəhər Məhkəməsinin çıxardığı qərar qüvvədə saxlanılıb. Bu barədə AYNAya RATİ Naxçıvan müxbiri, eyni zamanda hüquq müdafiəçisi Elman Abbasov bildirib.
Qeyd edək ki, yanvarın 19-da Naxçıvan şəhər Məhkəməsində bu məhkəmənin sədri, hakim Hüseyn Məmmədovun sədrliyi ilə həbsdə olan cəbhəçi Zeynalabdin Bağırzadənin vəkili Əsabəli Mustafayevin cəbhəçinin səhhətindəki problemləri nəzərə alaraq haqqında seçilmiş 3 aylıq həbs qətimkan tədbirinin ev dustaqlığı ilə əvəz edilməsi ilə bağlı qaldırdığı vəsatət üzrə məhkəmə prosesi keçirilib. Məhkəmə vəsatətin təmin olunmamağı haqda qərar çıxarıb və bu səbəbdən Naxçıvan şəhər Məhkəməsinin qərarından apellyasiya şikayəti verilib.
Yanvarın 16-da Naxçıvana iki günlük səfər edən vəkil Əsabəli Mustafayev Muxtar Respublika Prokurorluğunda olaraq Zeynalabdin Bağırzadənin haqqında açılmış cinayət işinin materialları ilə tanış olub, cəbhəçinin növbəti dindirilməsində iştirak edib və istintaq təcridxanasında onunla görüşərək saxlanma şəraiti ilə tanış olub. Vəkil Zeynalabdin Bağırzadənin səhhətində ciddi problemlərin olduğunu bildirib.
Xatırladaq ki, dekabrın 26-da Naxçıvan şəhər Məhkəməsində hakim Mehman Dünyamaliyevin sədrliyi ilə keçirilən məhkəmə prosesində AXCP fəalı Zeynalabdin Bağırzadə haqqında AR CM-in 310 (vəzifəli şəxsin səlahiyyətlərini mənimsəmə), 320.2 (bilə-bilə saxta sənədlərdən istifadə etmə), 178.3.2 (dələduzluq külli miqdarda ziyan vurmaqla törədildikdə) maddələri ilə 3 ay müddətinə həbs qətimkan tədbiri seçilib. Məhkəmə prosesi Naxçıvan Muxtar Respublikası baş prokurorunun təqdimatı əsasında keçirilib.
|
