Əməkdar artist Sevda Ələkbərzadə xarici səfərləri çox sevir. Yaradıcılığı ona bu imkanı yetərincə qazandırır. Fəqət onun vaxt məhdudiyyəti səfərin dadını çıxarmağa imkan vermir. Əksər ölkələri dəfələrlə dolaşan sənətçi deyir ki, yalnız İtaliya səfərini bu nöqteyi-nəzərdən dəyərləndirə bilib:
"İtaliyaya iki aylıq kursa getmişdim. Bu zaman mənə dərsdən sonra gəzib dolanmağa imkan verdi. Qeyd edim ki, İtaliya hər zaman arzuladığım və getmək istədiyim ölkə olub. Əgər bu qış ayında mənə səfər üçün ölkə seçmək şansı verilsəydi, düşünmədən İtaliyanı seçərdim. Nə yazıq ki, hazırda studiya həllini gözləyən mahnılarım buna mane olur".
Sənətçi qeyd edir ki, yaradıcılıq işləri ilə bağlı Avropa ölkələrində çox olub, lakin onun bir Amerika arzusu da var və okeanın o tayına yollanmağı, doyunca səyahət etməyi, bu böyük ölkəni yaxından tanımağı çox istəyir. Sevda Ələkbərzadə:
"Amerikaya getmək şansım çox olub. Amma konsertlərim buna imkan vermədi. Bacım Elmira uzun müddət Amerikada yaşayıb. Dəfələrlə məni yanına çağırırdı. Nə qədər çalışdımsa, işlərimi atıb gedə bilmədim".
Sevda xanımı səyahətlərində özünə ən çox cəlb edən muzeylər olur. İnsanların adətən şəxsi əşyalar almaq, qarderob təzələmək kimi üstünlük verdiyi səfərləri Sevda muzey ekskursiyası ilə davam etdirir. Onun sonuncu Moskva səfəri də bu şəkildə yadda qalıb.
|
