Qadın voleybolçular arasında Çempionlar Liqasının 2011/2012 mövsümündə "Dördlər finalı"na ev sahibliyi edən klubun adına aydınlıq gəlib. Məlumata görə, Bakıda həlledici mərhələyə təşkilatçılığı "Azərreyl" edəcək.
Artıq Avropa Voleybol Konfederasiyası (CEV) da onların bu hüquqa yiyələndiklərini təsdiqləyib.
Qrup mərhələsinin püşkatmasında Çempionlar Liqasının Bakıda keçiriləcəyi bilinsə də, ev sahibliyi edən klubun adı açıqlanmamışdı. Çünki analoji yarışda "Azərreyl"lə yanaşı, "Rabitə" də qüvvəsini sınayır və hər ikisi 1/8 finalda mübarizə aparır. Lakin məhz pley-off mərhələsinin püşkatmasında bu qeyri-müəyyənliyə son qoyulub. "Azərreyl" isə əvvəlki illərdən fərqli olaraq "Dördlər finalı"na kimi 2 oyunda da qalib gəlməlidir ki, yarımfinallara qatılsın.
Qeyd edək ki, bundan öncə "Dördlər finalı"na ev sahibliyi edən klub pley-off mərhələsinə qatılmırdı və birbaşa 1/2 finalda oynamaq hüququ qazanırdı.
|
