Bu il Azərbaycanın üç böyük ədibinin - Nizami Gəncəvinin 870, Mirzə Fətəli Axundzadənin 200 və Mirzə Ələkbər Sabirin 150 illik yubileyləri dövlət səviyyəsində qeyd olunacaq. Prezident İlham Əliyev bu işlər barədə müvafiq sərəncam imzalamışdır. Mədəniyyət və Turizm Nazirliyində bu yubileylərin yüksək səviyyədə keçirilməsi ilə bağlı görüləcək işlər müzakirə olunub.
Qərara alınıb ki, yubileylər çərçivəsində böyük ədib və mütəfəkkirlərin əsərləri nəşr olunsun, çap məhsulları Azərbaycanda və beynəlxalq kitab sərgilərində nümayiş etdirilsin, səyyar sərgilər keçirilsin. Bakıda beynəlxalq elmi konfransların təşkili, ölkədə fəaliyyət göstərən bütün dövlət teatrlarında, habelə türkdilli ölkələrdə, MDB məkanında M.F.Axundzadənin əsərlərinin tamaşaya qoyulması, hər üç ədibin doğulduğu məkanlara - Gəncə, Şəki və Şamaxıya turist səfərlərinin təşkili və s. təkliflər səslənib. M.Ə.Sabirin yubileyi ilə bağlı yekun tədbir mayın sonlarında, N.Gəncəvinin yubileyi ilə əlaqədar yekun tədbir oktyabrın əvvəllərində keçiriləcək, M.F.Axundzadənin yubileyinə isə noyabrda yekun vurulacaq.
|
