MEA Rəyasət Heyəti elmlər doktoru proqramı üzrə doktoranturaya qəbulun nəticələrini açıqlayıb. Rəyasət Heyətinin iclasında doktoranturaya qəbulla bağlı məlumat verən akademik Vaqif Fərzəliyev bildirib ki, elmlər doktoru proqramı üzrə doktoranturaya qəbulla bağlı 56 yer elan edilib.
Onlardan 27 əyani, qiyabi isə 29 yer olub. Faktik olaraq qəbul olunanların sayı 42 olub. Onlardan da 14-ü əyani, 28-i isə qiyabidir. Fərzəliyev deyib ki, Fizika-Riyaziyyat Elmləri Bölməsi üzrə 3 nəfər, Kimya Elmləri Bölməsi üzrə 7 (3 əyani, 4-ü qiyabi), Yer Elmləri Bölməsi üzrə 2 (qiyabi), Biologiya Elmlər Bölməsi üzrə 8 (3 nəfər əyani, 5-i qiyabi), İctimai-Humanitar Elmləri Bölməsi üzrə 17 nəfər (6-sı əyani, 11-i qiyabi), Naxçıvan Bölməsi üzrə 2 nəfər (qiyabi), Gəncə Elmi Bölməsi üzrə isə 3 nəfər (2 nəfər əyani, 1-i qiyabi) qəbul edilib.
Qeyd edək ki, iclasda AMEA prezidenti, akademik Mahmud Kərimov qiyabi doktoranturanı başa düşmədiyini söyləyib: "Qiyabi doktoranturanı necə başa düşmək olar?"-deyə M.Kərimov sualla iclas iştirakçılarına müraciət edib. Sonra V.Fərzəliyev, AMEA Radiasiya Problemləri İnstitutunun direktoru Adil Qəribov deyiblər ki, qiyabi doktorantlar institutların əməkdaşlarıdır.
MEA Biologiya Elmləri Bölməsinin akademik katibi, Tibb Universitetinin rektoru Əhliman Əmiraslanov da M.Kərimovun fikrini təsdiqləyib. O da istər doktorantura, istərsə də dissertanturanın qiyabi olmasını başa düşmədiyini söyləyib və bunu özlərini aldatmaq kimi qiymətləndirib: "Bunların qiyabi olması özümüzü aldatmaq kimi bir şeydir".
Ciddi müzakirə mövzusu olan bu məsələ ilə bağlı AMEA-nın birinci vitse-prezidenti, akademik Arif Həşimov ətraflı məlumat verib. O qeyd edib ki, 2009-cu ildə "Təhsil haqqında" qanunda doktorantura da təhsilin pilləsi kimi dəyərləndirilib:
"Eyni zamanda da dissertantura da saxlanıldı. Ancaq dissertanturada yazıldı ki, ancaq elmi və elmi-pedaqoji fəaliyyətlə məşğul olanlar dissertant ola bilərlər. Bu sahəyə axının qarşısını almaq üçün belə qiymətləndirildi ki, başqa sahələrdə işləyənlər dissertant ola bilməzlər".
A.Həşimov xatırladıb ki, Nazirlər Kabineti doktorantura təhsili haqqında qərar qəbul edəndə Azərbaycan Konstitusiyasının 42-ci maddəsini əsas götürərək hər kəsin təhsil almaq hüququ olduğunu nəzərə aldı və doktoranturaya qəbul da belə təsdiq olundu:
"Yəni həm fəlsəfə doktoru, həm də doktoranturaya qəbul qaydaları təsdiq olundu. Eyni zamanda dissertantura da orada qeyd edildi, ancaq elmi və elmi-pedaqoji fəaliyyət ödənilməklə qəbul edildi. Belə qərara alındı ki, təhsilin növü həm əyani, həm də qiyabi ola bilər. Həmçinin yazıldı ki, təhsil həm ödənişli, həm də ödənişsiz ola bilər".
A.Həşimov bildirib ki, beləliklə, qanunda həm fəlsəfə doktoru, həm də elmlər doktoru ilə bağlı hər iki təhsil növü var:
"Bütün bunları nəzərə alaraq, MEA həm fəlsəfə doktoru, həm də elmlər doktorluğuna qəbul proqramı elan edib. Akademiya tarixində ilk dəfədir ki, elmlər doktorunun mövzuları Rəyasət Heyətində təsdiq olunur ki, bu da qəbul qaydaları çərçivəsində aparılır".
A.Həşimov bir daha institut və bölmə rəhbərlərinə bildirib ki, əgər dissertant elmi və elmi-pedaqoji fəaliyyətlə məşğul olursa, o, dissertant kimi qəbul edilə bilər:
"Məsələn, Neft Şirkətindən gələnləri dissertant kimi qəbul edə bilməzsiniz. Orta məktəb, institut müəllimləri elmi işlə məşğul olmursa, onları da dissertant kimi qəbul edə bilməzsiniz".
Xatırladaq ki, doktorantura ilə bağlı qaydalara əsasən, elmlər doktoru proqramı üzrə doktoranturada təhsilin müddəti 5 ildir. Doktorantlar təsdiq olunduqları gündən təhsilə başlayırlar.
|
