Yanvarın 18-də Harvard Universitetinin 823 məzunu prezident İlham Əliyevə ünvanlanmış məktubu Azərbaycanın Vaşinqton səfirliyinə təqdim ediblər.
"Bəxtiyarın dostları" qrupunun üzvü Palak Şah "Amerikanın səsi" radiosuna bildirib ki, bu, aksiyalarının ilk tədbiridir. "Biz səfirliyin qarşısına yenidən qayıdacağıq", - deyə o qeyd edib.
Qrupun sözçüsü Rob Ness deyib ki, Bəxtiyarın tələbə yoldaşları məktubu səfirliyə təqdim edib. "Prezident İlham Əliyevə ünvanladığımız məktubun tələbi çox sadədir. Biz, sadəcə, Bəxtiyar Hacıyevin azad olunmasını tələb edirik. Çünki siyasi məhbusdur və Amnesty İnternational onu vicdan məhbusu elan edib", - deyə o bildirib.
Bəxtiyar Hacıyev Harvard Universiteti magistridir. 2010-cu il parlament seçkilərində deputatlığa namizədliyi zamanı hökuməti sərt tənqid edib. O, seçkilərdən sonra qanun pozuntuları ilə bağlı videogörüntülər yayıb. Gənc fəal habelə "11 mart - Böyük Xalq Günü" adlı virtual etiraz aksiyasının təşəbbüsçülərindən olub. Bütün bunlardan sonra hərbi çağırışdan yayınma ittihamı ilə iki il azadlıqdan məhrum edilib. Beynəlxalq təşkilatlar Bəxtiyar Hacıyevi vicdan məhbusu elan ediblər.
|
