Azərbaycanın ABŞ səfiri Elin Süleymanov yanvarın 18-də Ağ Evdə keçirilən rəsmi mərasimdə etimadnaməsini ABŞ prezidenti Barak Obamaya təqdim edib. Azərbaycanın ABŞ səfirliyindən APA-ya verilən məlumata görə, Barak Obama Azərbaycanla ABŞ arasında dostluq və tərəfdaşlığın uzun tarixə malik olduğunu qeyd edib.
ABŞ prezidenti beynəlxalq təhlükəsizlik səylərinə Azərbaycanın verdiyi həyati töhfələri yüksək dəyərləndirdiklərini bildirib. Barak Obama Azərbaycanı bütün Avroatlantik birliyin enerji təhlükəsizliyinin təmin olunmasında aparıcı tərəfdaş kimi səciyyələndirib.
Səfir Elin Süleymanov iki dövlət arasında münasibətlərin və çoxşaxəli tərəfdaşlığın dərinləşdirilməsinə və genişləndirilməsinə Azərbaycanın sadiq olduğunu qeyd edib.
Qeyd edək ki, Elin Süleymanov 2011-ci il oktyabrın 26-da prezident İlham Əliyev tərəfindən Azərbaycanın ABŞ-da fövqəladə və səlahiyyətli səfiri vəzifəsinə təyin olunub. Buna qədər isə o, Azərbaycanın Los-Anceles baş konsulu vəzifəsində çalışırdı.
|
