Rusiya paytaxtında "Qorbaçovu məhkəməyə verək" adlı etiraz aksiyası keçirilib. Moskva şəhərinin "Arbat", "Novokuznetskaya" və "Ulitsa 1905" metro stansiyaları qarşısında keçirilən etiraz aksiyaları "Rusiya Vətəndaşlarının Həmkarlar İttifaqı" ("Profsayuz qrajdan Rossii") İctimai Birliyi tərəfindən təşkil olunub. İlk olaraq Arbat 11 ünvanında yerləşən "Exo Moskvı" radiostansiyasının qarşısında toplanan aksiya iştirakçıları əllərində "Qorbaçovu məhkəməyə verək" yazılı plakatlar tutaraq ictimaiyyətin diqqətini cəlb etmək istəyiblər. Aksiya iştirakçıları tədbirin "Exo Moskvı" radiostansiyasının ofisinin qarşısında keçirilməsinin səbəbinin radionun Qərbin maraqlarını müdafiə etməsi və Rusiyanı parçalamaq siyasəti yürütməsi ilə bağlı olduğunu bildiriblər.
Birliyin Moskva bölməsinin rəhbəri Aleksandr Kurinov açıqlamasında Mixail Qorbaçovu Sovetlər İttifaqını dağıtdığına, Bakıda bir gündə 132 nəfərin qətlə yetirilməsinə əmr verdiyinə, Vilnüs və Tiflisdə kütləvi qırğınlar törətdiyinə görə məhkəməyə verməyə hazırlaşdıqlarını söyləyib:
"Biz bu barədə Rusiya İstintaq Komitəsinə müraciət ünvanlamışıq. Mixail Qorbaçov barədə cinayət işinin yenilənməsini tələb edirik. Bu cinayət işi hələ 1991-ci ildə SSRİ Baş Prokurorluğunun şöbə müdiri Viktor İlyuxin tərəfindən başlanıb. Lakin sonra o vəzifədən getdiyinə görə cinayət işinə xitam verilib. Biz tələb edirik ki, bu cinayət işi yenilənsin, icraata götürülsün. Əgər İstintaq Komitəsi tələbimizi rədd etsə, məhkəməyə müraciət edəcəyik. Məhkəmə də etiraz etsə, Avropa Məhkəməsinə müraciət edəcəyik".
Aleksandr Kurinov dünən "Exo Moskvı" radiostansiyasının da Qorbaçovun rolunu oynadığını söyləyib:
"Qorbaçov həmin dövrdə Qərbin maraqlarını necə müdafiə edirdisə, bu gün bu radio bu siyasətdən istifadə edərək Rusiyanı parçalamaq siyasəti yürüdür".
O, Qorbaçov əleyhinə olan etiraz aksiyalarının təkcə Moskvada deyil, Rusiyanın digər böyük şəhərlərində də keçiriləcəyini söyləyib.
|
