Xəbər verdiyimiz kimi, yanvarın 25-də "Buta" Sarayda "İlin hit mahnısı-2011" adlı qala-konsert təşkil ediləcək. Mükafatlandırma və musiqi çıxışları ilə yadda qalacaq gecəyə hazırlaşanlardan biri Safura Əlizadədir. Qəzetimizə bildirib ki, hazırda studiyadadır və gecədə ifa edəcəyi repertuarı hazırlayır.
İfaçı bu musiqili tədbirdə həm oxuyacaq, həm də mükafatlandırılacaq. Oxuyacağı mahnılar yenidir və o, bunu orijinal tərtibatda təqdim edəcəyini bildirdi. Sürprizi qaçırmamaq üçün Safura təfərrüata varmadı.
Xatırladaq ki, sözügedən tədbir artıq iki dəfə müxtəlif səbəblərdən təxirə düşüb. Təşkilatçı əsas problemin deyilən tarixdə 4 sənətçinin Bakıda olmadığını əsas gətirdi. Bunlardan Biri Nigar Camal olub. Qeyd edək ki, tədbirin əsasını Eurovision qələbəmiz təşkil etdiyindən Nigarın orada iştirakı vacibdir. Lakin o, xaricdə olan ekstrim işlərini yoluna qoymaq məcburiyyətində qaldığı üçün Bakını tərk edib. Təşkilatçı təyin olunan tarixdə tədbirin mütləq keçiriləcəyini söylədi.
Safuraya gəlincə, qeyd edək ki, rol aldığı "Qaranlıqlar çiçəyi" filmindəki iştirakı davam edir. Tez-tez İsveçə yaradıcılıq səfəri edən sənətçi hər Bakıya gəlişində böyük zamanını məhz serialın çəkilişlərinə ayırır.
|
